Shyǵys Qazaqstan oblysynda «emshiler» qamaýǵa alyndy
SEMEI. QazAqparat – Semeı qalasynda zeınetkerlerdi dýadan qaıtaratynyn aıtyp sendirgen alaıaqtar ustaldy, dep habarlaıdy QazAqparat tilshisi.
Shyǵys Qazaqstan oblystyq Polıtsııa departamenti baspasóz qyzmetiniń málimetinshe, qart kisilerdi áńgimege tartqan jalǵan emshiler: «Sizge dýa jasalǵan. Tez arada ony qaıtarý kerek», - dep arbaǵan.
Tamyz aıynyń sońynda 70 jastaǵy zeınetker aldanyp qalǵanyn aıtyp Besqaraǵaı aýdandyq polıtsııa bólimine júgindi. Onyń aıtýynsha, tús ýaqytynda úıine belgisiz eki áıel úı satyp alatyndyǵyn aıtyp kelgen. Sóz arasynda olar ájege dýa jasalǵanyn, ony qaıtarý úshin birneshe rásim qajettigin jetkizedi. Buǵan sengen qala turǵyny alaıaqtarǵa aqsha men altyn áshekeılerin bere salǵan. «Emshiler» altyndy túıinshekke orap zeınetkerge beredi de, tek birneshe kúnnen keıin ashýǵa bolatynyn aıtady. Alaıda keıinnen túıinshektiń ishinde eshteńe joq bolyp shyqty.
Saldarynan qarııalarǵa 300 myń teńge mólsherinde materıaldyq zalal keltirilgen. Budan bólek, dál osyndaı ádispen alaıaqtar Ulan aýdanynyń 81 jastaǵy turǵynynyń 1,5 mıllıon teńgeden astam qarajatyn ıemdendi.
«Tártip saqshylary ákki alaıaqtardyń kim ekenin anyqtaý úshin jedel-izdestirý sharalaryn júrgizdi. Kóp uzamaı Semeı qalasynan kúdiktiler anyqtalyp, ustaldy. Olar Almaty oblysynyń turǵyndary bolyp shyqty. 32 jáne 52 jastaǵy eki áıel jáne olardyń 36 jastaǵy sybaılastary óz kinálaryn moıyndap otyr. Aıǵaqty zattar tárkilenip, kúdiktiler ýaqytsha ustaý ızolıatoryna qamaýǵa alyndy», - deıdi ShQO PD bastyǵy Saǵat Madıev.
Atalǵan fakti boıynsha QR QK-niń 190-baby 1-bóligi (Alaıaqtyq) boıynsha sotqa deıingi tergeý amaldary júrgizilýde.
