Shyǵys Qazaqstan oblysynda dala órti órship tur
ÓSKEMEN. QazAqparat – Shyǵys Qazaqstan oblysynda dala órti órship tur. Kún saıyn qutqarýshylar 20-30 órtti sóndirýge attanady, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar dala órtimen damylsyz kúresýde. 10 mamyrda Altaı aýdany Ermakovka aýylynda shóp pen butalar janǵan. Otty aýyzdyqtaýǵa jeke quramnan 54 adam, 8 tehnıka, jergilikti atqarýshy organnan 8 qyzmetker, 2 tehnıka, ormanshylardan 20 adam men 4 tehnıka jumyldyryldy. Budan bólek, «Qazavıaqutqarý» AQ-nyń MI-8 tikushaǵy tartylyp, áýeden 33 tonna sý tógildi. 70 gektar aýmaqqa jaıylǵan órt saǵat 20.50-de oqshaýlandy. Aldyn ala málimet boıynsha jalynnyń shyǵý sebebi – otty paıdalanýda qaýipsizdik sharalaryn saqtamaý.
Kún saıyn órt sóndirý bólimsheleriniń qyzmetkerleri 20-30 ret dala órtin óshirýge attanady. Kóp jaǵdaıda órt ashyq aýmaqta, saıajaılarda jáne turǵyn úı sektorynda tirkeledi.
Esterińizge sala ketsek, osyǵan deıin ShQO-da tabıǵı qoryqta 120 gektarǵa jaıylǵan órt sóndirilgenin habarlaǵan edik.
