Shyǵys Qazaqstan oblysynda bıyl 500 km astam jol jóndeledi
ShQO ákimdiginde ótken jınalys barysynda aımaq basshysy Danıal Ahmetov jergilikti bıliktiń erekshe kóńil bóletin negizgi baǵyttardy atady. Onyń aıtýynsha, kóptiń kókeıinde júrgen basty máseleler – turǵyn úı qurylysy men joldardyń jóndelýi.
«Osy turǵyda bıyl iske asyrylýy tıis jumystar bekitildi. Jyl sońyna deıin kem degende 685 myń sharshy metr turǵyn úıdi paıdalanýǵa berý kózdelip otyr. Sondaı-aq oblys boıynsha 543 shaqyrym jol jóndelýi tıis. Aýdandardaǵy paıdalanylmaı bos jatqan jerler memleket menshigine tárkilenip, halyq ıgiligine berilýi úshin tıisti jumysty kúsheıtý qajet», - dedi Danıal Ahmetov.
Sondaı-aq óńir basshysy 1 mamyrda elimiz atap ótetin – Qazaqstan halqynyń birligi kúnine toqtalyp, óńirdegi ultaralyq birlikti nyǵaıtý eń negizgi maqsattardyń biri ekendigin jetkizdi.
«Elimizdiń ultaralyq kelisim jolymen júrýden basqa amaly joq. Túrli etnos ókilderi turatyn Qazaqstan halqynyń maqsaty ortaq bolýy tıis», - dedi ShQO ákimi.
Eske salaıyq, osyǵan deıin ShQO-da sońǵy bes jylda 2 myńnan astam kópbalaly otbasyna baspana berilgenin habarlaǵan edik.
