Shyǵys Qazaqstan oblysynda aýa raıyna qaramastan egin jınaý jalǵasýda
ÓSKEMEN. QazAqparat – Shyǵys Qazaqstan oblysynda jaýyn-shashynǵa qaramastan egin jınaý naýqany toqtatylǵan joq, dep habarlaıdy QazAqparat tilshisi.
Kúz mezgili kelisimen dıqandar ádettegideı ónim jınaýǵa kirisken. Qazirgi tańda óńirde jazdyq bıdaı, arpa, suly, qaraqumyq, masaq qospasy, júgeri, tary, burshaq, baqsha daqyldary jáne kúzdik raps 100% jınalǵan.
«Oblystyń keıbir aımaqtaryndaǵy aýa-raıynyń qolaısyzdyǵy jumysqa kedergi keltirýde. Dese de dıqandar jaýyn-shashynǵa qaramastan jumystaryn jalǵastyryp jatyr. Kókónis ónimdiligi gektoryna – 282,7 tsentnerdi, baqsha daqyldary - 328,6 tsentnerdi qurady. Sondaı-aq maıly daqyldar 26,3%, kóktemgi raps 54%, soıa 73,6%, kúnbaǵys 24%, maqsary 86,4%, qysha 71,1%, zyǵyr 13%, kartop 98% jınaldy», - delingen ShQO Aqparat ortalyǵy taratqan málimette.
Óńir agroqurylymdary egin jınaý naýqanyn jemisti júrgizýge kómektesetin materıaldyq-tehnıkalyq quraldarmen jáne basqa da resýrstarmen tolyqtaı qamtylǵan. Oblystaǵy sharýashylyqtar men elevatorlarda 90 keptirgish pen astyq jınaıtyn 3248 kombaın bar. Astyqty saqtaý jáne keptirý qondyrǵylarymen jabdyqtalǵan lıtsenzııasy bar 8 elevator jumys isteıdi.
Sonymen qatar oblys sharýalaryna aýa raıynyń qolaısyzdyǵyna baılanysty QR Energetıka mınıstrligi egin jınaý kezinde tuqymdardy keptirý úshin qosymsha 7 myń tonna dızel otynyn bólgen.
