Shyǵys Qazaqstan oblysynda Antikor ortalygy ashyldy
Saltanatty sharaǵa oblysqa arnaıy jumys saparymen kelgen QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaev pen oblys ákiminiń birinshi orynbasary Erlan Aımuqashev qatysty.
Sybaılas jemqorlyqqa qarsy servıstik qyzmet kórsetý ortalyǵynda azamattar qajetti zańgerlik keńes pen saýaldaryna túbegeıli jaýap alyp, oblys basshylarynyń qabyldaýyna da jazyla alady.
Sybaılas jemqorlyq faktilerine kezikken bıznesmendermen de jumys jolǵa qoıylatyn bolady. Ortalyqtyń birinshi qabaty tolyqtaı turǵyndarǵa qyzmet kórsetýge arnalǵan. Sondaı-aq kire beriste Sybaılas jemqorlyqqa qarsy is-qımyl agenttiginiń ShQO boıynsha departament basshysy Erlan Jalmaǵambettiń gologramalyq 3D beınesi ornatylǵan. Lazerli elektrondy beıne arnaıy dybystyq programma negizinde turǵyndarǵa jol siltep, kerek mamanǵa joldaıdy.
Jalpy, Shyǵys Qazaqstanda sybaılas jemqorlyqpen kúres sharalary alǵa qoıylǵan. Oblys elimiz boıynsha alǵashylardyń biri bolyp «Open space» formatyna kóshti. Sonymen qatar, jemqorlyq deńgeıin tómendetý maqsatynda «Shyǵys – adaldyq alańy» jobalyq keńsesi jumys isteýde. Onyń barlyǵy qoǵam men memleket arasynda kedergisiz baılanys ornatýǵa baǵyttalyp otyr.
Shara barysynda Alık Shpekbaev oblys aktıvimen kezdesý ótkizip, elimizdegi sybaılas jemqorlyqty aldyn alý men joıý sharalaryna toqtalyp ótti.
«Qoǵam damýyn ilgerletip, halyqtyń turmysyn jaqsarta túsý úshin jemqorlyqty túbegeıli joıý qajet. Búgin elimizde osy maqsattarda qomaqty ister atqarylyp, arnaıy jobalar qabyldanyp, túrli is-sharalar júrgizilýde. Qazirgi tańda mektep pen kolledjderdiń oqytý baǵdarlamalaryna da parasattylyq saǵattary engizilgen. Onyń barlyǵy adam sanasynyń ashyqtyǵyna baǵyttalyp otyr», – dedi agenttik tóraǵasy.
Jıyn sońynda Alık Shpekbaev jergilikti departamenttiń bes qyzmetkerine jańa páter kiltin tabystap, sybaılas jemqorlyqpen kúresti nasıhattap júrgen qoǵam belsendileri men buqaralyq aqparat quraldary ókilderin alǵys hattarmen marapattady.
