Shyǵys Qazaqstan oblysynda 11 mektep salynyp jatyr
Óńir boıynsha mektepterdi jóndeýge bıyl 2 mlrd teńgeden astam qarjy bólingen. Bul týraly búgin ShQO Aqparat ortalyǵynda ótken baspasóz máslıhaty barysynda oblystyq Bilim basqarmasynyń basshysy Innesa Chernysheva málim etti.
«Jańa oqý jylynyń bastalýyna 10 kún qaldy. Jaz boıy birqatar mektepte jóndeý jumystary júrgizildi. Naqty aıtqanda, 7 mektepti kúrdeli jóndeýge 700 mln teńge, 70 mektepti aǵymdaǵy jóndeýge 1,4 mlrd teńge bólindi. Budan bólek, 39 bilim ordasyndaǵy jylý júıesine aǵymdaǵy jóndeý jumystary júrgizilip jatyr. Jumystar jylý berý maýsymy bastalǵanǵa deıin tolyqtaı aıaqtalady», - deıdi ol.
Bıyl oblysta 4200 oryndyq 11 mektep salynýda. Onyń ishinde «Jaıly mektep» ulttyq jobasy aıasynda 24,1 mlrd teńgege 7 mekteptiń qurylysy bastalǵan. Óskemende 1500 oryndyq 3 mektep, Rıdderde 600 oryndyq, Shemonaıhada 300 oryndyq, Glýbokoe aýdanyna qarasty Opytnoe pole jáne Beloýsovka aýyldarynda 600 oryndyq 2 mektep boı kótermek. Jospar boıynsha olar kelesi jyly paıdalanýǵa beriledi.
«Bilim berý ınfraqurylymyn qoldaý qorynyń qarajaty esebinen Óskemende «Nurly jol» shaǵyn aýdanynda 600 orynǵa arnalǵan mekteptiń qurylysy jalǵasýda. Ol 2023 jyldyń jeltoqsan aıynda salynyp bitedi. Al Zaısan qalasynda 300 oryndyq jańa mekteptiń qurylysy 2024 jyldyń qyrkúıek aıynda aıaqtalady dep kútilýde. Qurylystyń jalpy quny 4,9 mlrd teńgeni quraıdy», - deıdi basqarma basshysy.
Sonymen qatar jergilikti bıýdjet esebinen jalpy quny 2,5 mlrd teńgeni quraıtyn 2 mektep salynýda. Onyń biri – Tarbaǵataı aýdany, Sheńgeldi aýylynda 100 oryndyq, ekinshi mektep – Altaı aýdany Jańa Buqtyrma aýylynda 200 oryndyq.
Jalpy 2023-2024 oqý jylynda Shyǵys Qazaqstan oblysynda 343 mektepte 98 107 oqýshy bilim alady. 9 654 bala mektep tabaldyryǵyn alǵash ret attaıyn dep otyr.
