Shyǵys Qazaqstan oblysynda 10 myńǵa jýyq bala Pfizer vaktsınasyn aldy

ÓSKEMEN. QazAqparat – Shyǵys Qazaqstan oblysynda 10 myńǵa jýyq bala Pfizer vaktsınasyn saldyrdy, dep habarlaıdy QazAqparat tilshisi.

ShQO Densaýlyq saqtaý basqarmasy baspasóz qyzmetiniń málimetine súıensek, qarasha aıynyń basynda oblystyń medıtsınalyq mekemelerine atalǵan ekpeniń 35 100 dozasy kelip túsken. Búgingi tańda tıisti sanattaǵy adamdardy ımmýndaý jumystary qarqyndy júrgizilip jatyr.

«Óńir boıynsha koronavırýsqa qarsy amerıkalyq Pfizer vaktsınasyn alǵandar sany kún saıyn artyp keledi. Naqty aıtqanda, qarashanyń 16-ynan bastap 12-18 jas aralyǵyndaǵy 9941 bala ekpe saldyrǵan. Balalardy vaktsınalaý tek ata-anasynyń jazbasha ruqsatymen júzege asyrylýda. Sondaı-aq júkti jáne bala emizetin 972 áıel egildi», - delingen habarlamada.

Esterińizge sala ketsek, osyǵan deıin Shyǵys Qazaqstanda koronavırýs statsıonarlary 17% júktelgenin habarlaǵan bolatynbyz.