Shyǵys Qazaqstan oblysy men Altaı Respýblıkasy týrızmdi birlesip damytpaq
ÓSKEMEN. QazAqparat - Shyǵys Qazaqstan oblysynyń ákimi Danıal Ahmetov Reseıdiń Altaı Respýblıkasynyń basshysy Aleksandr Berdnıkovpen eki óńir arasynda birqatar saladaǵy áriptestikti nyǵaıtýǵa ýaǵdalasty. Memorandýmǵa qol qoıý rásimi Petropavlda ótken Qazaqstan-Reseı Óńiraralyq yntymaqtastyǵynyń XV forýmy aıasynda ótti, dep habarlaıdy QazAqparat altaynews.kz saıtyna silteme jasap.
Atalǵan qujat Shyǵys Qazaqstan men Altaı Respýblıkasynyń saýda-ekonomıkalyq, mádenı-áleýmettik, aqparattyq, kóliktik, sondaı-aq aýyl sharýashylyǵy salalaryndaǵy baılanysty jańa deńgeıge kóterýge múmkindik beredi. Bul týraly jýrnalısterge bergen suhbatynda aımaq basshysy D.Ahmetov málim etti.
«Altaı Respýblıkasy men Shyǵys Qazaqstan oblysynyń uqsas tustary kóp. Bizdiń múddelerimiz de birdeı. Endi eki jaqqa da kóp paıda tıgizetindeı is-qımyl josparyn ázirleýimiz kerek. Eń aldymen, altaılyq áriptesterimizben taýar aınalymymyzdyń mólsherin arttyrý jaǵyn oılastyrýymyz qajet. Búgin kez kelgen memlekettiń damýyna áser etetin faktorlardyń biri - týrızm salasy. Bul jaǵynan eki óńirdiń de áleýeti zor. Aldaǵy maqsatymyz shyǵysqazaqstandyqtar men altaılyqtardyń esh qıyndyqsyz shekara asyp júrýine jaǵdaı jasaý. Shyǵys Qazaqstan oblysy da, Altaı Respýblıkasy da qasıetti Altaı taýlarynyń aýmaǵynda ornalasqan. Sol sebepti, «Altaı - ortaq úıimiz» jáne «Altaı - túrki áleminiń altyn besigi» atty jobalardy júzege asyrýdamyz. Bolashaqta Qazaqstan jáne Reseı jerin basyp ótetin jańa týrıstik marshrýttar ashýymyz kerek», - dedi oblys ákimi.
Danıal Ahmetov sonymen qatar búginde Shyǵysta emdeý-saýyqtyrý týrızmin damytýǵa baǵyttalǵan baǵdarlama ázirlenip jatqanyn málimdedi. Óńirde oqıǵaly týrızm salasyn órkendetý jospary bar ekenin de habarlady.
Óz kezeginde Altaı Respýblıkasynyń basshysy reseılikter qazaqstandyqtarǵa týrızm salasynda jan-jaqty qyzmet túrlerin kórsetýge ázir ekenin jetkizdi.
«Qazaqstandyq áriptesterimizben baılanysymyz myǵym. Altaı sizder úshin de, biz úshin de kıeli meken, qasterli uǵym. Kezinde dál osy Altaı jerinde Túrki qaǵanatynyń negizi qalanǵan bolatyn. Sondyqtan bul túrkitildes ulttardyń qaı-qaısysy úshin de atajurt deýge bolady. Muztaý taýyn bir jartysy Shyǵys Qazaqstan oblysyna qaraıdy. Demek, shyǵysqazaqstandyqtarmen múddemiz de, qundylyqtarymyz da bir», - degen Aleksandr Berdnıkov shyǵysqazaqstandyq ınvestorlardy áriptestikke shaqyrdy.
