Shyǵys Qazaqstan oblystyq soty ózin órtemek bolǵan adamnyń isine pikir bildirdi
SEMEI. QazAqparat – Semeıdegi sot sheshimimen kelispegendikten elordaǵa baryp ózin órtemek bolǵan adamnyń isine Shyǵys Qazaqstan oblystyq soty pikir bildirdi, dep habarlaıdy QazAqparat tilshisi.
5 qyrkúıek kúni Semeı qalasynyń turǵyny elordada Máńgilik el men Qonaev dańǵyldary qıylysyna sot sheshimimen kelispeıtini jazylǵan plakatpen shyqqan.
Ústine benzın shashqan ol ózin órtep jibermek boldy. 37 jastaǵy er adamdy polıtseıler toqtatty.
Oblystyq sottyń baspasóz qyzmeti taratqan málimetke súıensek, bul azamat úıi men sharýashylyq qora-jaıynyń qasyna salynǵan emhana ıesimen sottasqan.
«Emhana sol jerge 2014 jyly salynǵan. Bir jyldan keıin nysan akt boıynsha paıdalanýǵa qabyldanǵan soń, ony salǵan adam qazirgi ıesine satqan. Ózin órtemek bolǵan azamat emhananyń úıin kúnnen jaýyp qalǵanyn, sonyń saldarynan qabyrǵalary kógerip, jaǵymsyz ıis paıda bolǵanyn aıtyp, qalalyq sotqa aryzdanǵan. Sot emhanany buzý týraly sheshim shyǵardy», - delingen aqparatta.
Alaıda bul sheshimmen kelispegen emhana ıesi oblystyq sotqa apellıatsııalyq shaǵym túsirdi.
Onyń aıtýynsha, jalpy aýdany 598,3 sharshy metrdi quraıtyn eki qabatty medıtsına mekemesi talaı adamdy jumyspen qamtyp, halyqtyń densaýlyǵyna qyzmet etip otyr.
Onyń jalpy quny - 150 mln teńge.
«Apellıatsııa soty eki tarapty medıatsııa arqyly tatýlastyrmaq boldy. Jaýapker talapkerdiń úıi men jer telimin 12 mıllıon teńgege satyp alýǵa usynys jasaǵan. Alaıda talapker buǵan kelispedi. Sot obektini salý kezindegi araqashyqtyqtyń saqtalmaýy eń sońǵy shara – ǵımaratty buzýǵa negizsiz dep sanady. Nysan jeke menshiktegi ýchaskede turǵyzylǵandyqtan zańsyz salyndy deýge kelmeıdi. Emhana talapkerdiń úıimen birge japsarlaı turǵan, keıin buzylǵan eski úıdiń ornyna salynǵan. Úı men emhananyń arasy - 8,4 metr», - delingen aqparatta.
Onyń ústine talapker úıiniń qabyrǵalary kógerýine emhananyń kún sáýlesinen jaýyp qalýy sebep bolǵanyn rastaıtyn dáleldemelerdi usynbaǵan.
Sonda da qazirgi ýaqytta emhana ıesi úıdi kúnnen jaýyp turǵan qazandyqty buzyp tastaǵan.
«Osyǵan oraı emhanany buzý týraly sot qaýlysynyń kúshi joıyldy. Taraptar bul sheshimmen kelispegen jaǵdaıda Joǵarǵy sotqa zańda belgilengen merzimde shaǵymdanýǵa quqyly», - dep habarlady sottyń baspasóz qyzmeti.
