Shyǵys Qazaqstan men Pavlodar oblystarynda jalǵan qujat jasaýmen aınalysqan qylmystyq top ustaldy

ÓSKEMEN. QazAqparat – «STOP obnal» jedel aldyn alý sharasy barysynda Shyǵys Qazaqstan men Pavlodar oblystarynda jalǵan qujat jasaýmen aınalysqan qylmystyq toptyń joly kesildi, dep habarlaıdy QazAqparat.

Shyǵys Qazaqstan oblysy boıynsha Ekonomıkalyq tergeý departamentiniń málimetine súıensek, uıymdasqan qylmystyq top músheleri oryndalmaǵan jumys pen jetkizilmegen taýarlarǵa shot-faktýra jazýmen aınalysqan.

«Olar 2018-2020 jyldar aralyǵynda Shyǵys Qazaqstan men Pavlodar oblystarynyń aýmaǵynda toǵyz mekeme quryp, zańsyz áreketterin iske asyrǵan. Qylmystyq toptyń jalpy aınalymy 4 mıllıard teńgeden asady. Qazir bul toptyń músheleri qamaýǵa alyndy. Qujattar, mórler, chek kitapshalary jáne 9 mıllıon teńge tárkilendi. Tergeý amaldary jalǵasýda», - dep habarlady departament mamandary.