Shyǵys Qazaqstan men Qaraǵandy oblystarynda altyn kenin barlaý úshin 60 mlrd. teńgeden astam qarjy quıylady - N.Saýranbaev
ASTANA. QazAqparat - Shyǵys Qazaqstan men Qaraǵandy oblystarynda altyn kenin barlaý jumystaryna 60 mlrd. teńgeden astam qarjy quıylady. Bul týraly búgin «Geologııa - 360» suhbat alańynda QR Indýstrııa jáne jańa tehnologııalar vıtse-mınıstri Nurlan Saýranbaev aıtty.
Onyń atap ótýinshe, sońǵy ýaqytta elimizde geologııalyq barlaý jumystaryna memleket tarapynan 508 mln. teńge bólingen. Árıne, bul qarjynyń mardymsyz ekendigi túsinikti. Óıtkeni mundaı qarajyǵa bir aýyldyń aýmaǵynda ǵana barlaý jumystaryn júrgizýge bolady.
«Budan kóp qarjy kerek ekendigi belgili. Sondyqtan da qazirgi ýaqytta biz eki jobany júzege asyra bastadyq. Olarǵa sáıkes 2 óńirdiń árqaısysyna 30 mlrd. teńgeden astam qarjy bólinedi. Onyń basym bóligi - jeke ınvestıtsııa», - dedi ol.
Vıtse-mınıstrdiń atap ótýinshe, atalǵan maqsattarǵa qol jetkizý úshin ótken aptada birneshe kompanııamen arada memorandýmǵa qol qoıylǵan. Atalǵan qujatqa sáıkes, Shyǵys Qazaqstan men Qaraǵandy oblystarynda «Kendi Altaı» jáne «Saryarqa» atty jobalar qolǵa alynyp, polımetall, mys, altyn kenderin barlaý jumystary júrgiziledi.
«Qazirgi ýaqytta biz jumys tobyn qurýdamyz. Onyń quramyna memlekettik organdar, jeke ınvestorlar kiredi. Sodan keıin birlesip, atalǵan óńirlerde barlaý-izdeý jumystaryn júrgizetin bolamyz», - dedi N.Saýranbaev.
