Shyǵys Qazaqstan halqynyń 87 paıyzy memlekettik tildi meńgergen

ÓSKEMEN. QazAqparat – Shyǵys Qazaqstan oblysyndaǵy eresek turǵyndardyń 87 paıyzy memlekettik tildi meńgergen, dep habarlaıdy QazAqparat tilshisi.

Oblys boıynsha qazaq tilin oqytatyn 12 til ortalyǵy jumys isteıdi.

Bul týraly aımaqtyq kommýnıkatsııalar qyzmetinde ótken baspasóz máslıhatynda ShQO mádenıet basqarmasy basshysynyń orynbasary Roza Tólemisova aıtty.

- 2022 jyly til ortalyqtarynda 3263 eresek turǵyn oqýǵa tartyldy. Onyń ishinde memlekettik tilde – 2479 adam, aǵylshyn tilinde – 639 adam, orys tilinde – 109 adam bilim aldy. 2020-2021 jyldary attestatsııalyq testileýden 169, QAZTEST júıesi boıynsha dıagnostıkalyq testileýden 1433 azamat ótip, memlekettik tildi meńgerý deńgeıin rastady. Búgingi tańda oblys halqynyń memlekettik tildi meńgergen úlesi 87 paıyzdy, aǵylshyn tilin biletin eresek turǵyndar sany – 7 paıyzdy, úsh tildi meńgergenderdiń úlesi – 6 paıyzdy qurap otyr. Oryssha sóıleıtinderdiń sany 92 paıyzdy quraıdy, - dedi ol.

Roza Tólemisovanyń aıtýynsha, kórneki aqparattyń jáne jarnamalyq mátinderdiń saýattylyǵyn baqylaýǵa úlken mán beriledi.

- 2022 jyldyń naýryz-sáýir aılarynda «Saýatty jarnama – mádenıet nyshany» atty aılyq ótkizildi. Óskemen qalasynda jarnamalyq jáne kórneki aqparat mátininiń durystyǵyn tekseretin «Til qorǵandary» monıtorıngtik toptary quryldy. Osy toptar jumysynyń nátıjesinde 1000-ǵa jýyq nysan tekserilip, 348 qate mátin anyqtalyp, túzetý jumystary júrgizildi, – dedi basqarma basshysynyń orynbasary.