Shyǵys Qazaqstan dıqandary bıyl egis alqabyn 10,7 myń gektarǵa arttyrmaq

ÓSKEMEN. QazAqparat – Shyǵys Qazaqstan oblysynyń dıqandary bıyl egis alqabyn 10,7 myń gektarǵa arttyrmaq, dep habarlaıdy QazAqparat tilshisi.

ShQO aýyl sharýashylyǵy basqarmasynyń málimetine súıensek, bıyl agroónerkásiptik keshen salasyna 24,5 mlrd teńge bólingen. Dıqandarǵa «Agrarlyq nesıe korporatsııasy» AQ arqyly 8 mlrd teńge nesıe berilmek.

«Bıyl sútti mal sharýashylyǵynda, sút-taýar fermalaryn salý jáne rekonstrýktsııalaý boıynsha 6 jobany iske asyrý josparlanǵan. Sonyń nátıjesinde, sút-taýar fermalarynyń sút óndirý kólemi jylyna 47,5 myń tonnaǵa ulǵaıady. Bul kelesi jyly jergilikti sút óńdeý kásiporyndarynyń júktemesin 65%-ǵa deıin jetkizýge múmkindik beredi», - deıdi basqarma basshysynyń mindetin atqarýshy Ramıl Saǵandyqov.

Osy jyldan bastap oblysta «Aýyl amanaty» halyqtyń tabysyn arttyrý baǵdarlamasy qolǵa alynbaq. Sonyń sheńberinde aýyl halqyna 1,5 mlrd teńgege nesıe berý kózdelgen.

Baǵdarlamanyń negizgi maqsaty – aýyl sharýashylyǵy taýaryn óndirýshilerdi jan-jaqty qoldaý, aýyl turǵyndaryn agrarlyq bızneske barynsha tartý, azyq-túlik qaýipsizdigine jáne azamattardyń ómir súrý sapasyn jaqsartýǵa baılanysty máselelerdi sheshý.

«Boljamǵa sáıkes, 2023 jyly óńir boıynsha aýyl sharýashylyǵy daqyldarynyń egis alqaby 653,1 myń gektardy quraıdy. Bul ótken jylǵy deńgeıden 10,7 myń gektarǵa artyq», - deıdi R.Saǵandyqov.

Eske salsaq, osyǵan deıin Shyǵys Qazaqstan dıqandarynyń sý tapshylyǵy zardabyn tartyp otyrǵany habarlanǵan.