Shyǵys Qazaqstan aýyldarynda veterınar tapshylyǵy sezilýde

ÓSKEMEN. QazAqparat – Shyǵys Qazaqstan oblysynyń aýyldarynda veterınar tapshylyǵy sezilýde, dep habarlaıdy QazAqparat tilshisi.

ShQO Aýyl sharýashylyǵy basqarmasynyń málimetine súıensek, jyl saıyn óńirde veterınarııa mamandyǵy boıynsha orta eseppen 135 túlek joǵary jáne orta oqý oryndaryn bitiredi. Alaıda aýylda jumys isteýge 50-ge jeter-jetpes adam ǵana barady.

Qazir oblystyń veterınarııa salasyndaǵy barlyq jumys oryndarynyń 80 paıyzynda maman bar. Al onyń 30 paıyzy zeınet jasynda nemese zeınetkerlikke taıap qalǵan.

«Ótken jyly maman tapshylyǵy máselesin sheshý úshin mal dárigeriniń jalaqysy 60 myńnan 130 myń teńgege kóterildi. Bıyl Aýyl sharýashylyǵy mınıstriniń buıryǵyna sáıkes, veterınarlardyń aılyǵyn taǵy 35 paıyzǵa deıin arttyrý josparlanýda», - deıdi basqarma basshysy Ramıl Saǵandyqov.

Onyń aıtýynsha, osy salaǵa jastardy tartý maqsatynda veterınarııalyq oqý oryndarynyń stýdentteri men túlekteri úshin ashyq esik kúnderi, bos oryndar jármeńkesi jıi ótkizilýde. Stýdentterdiń agroónerkásip kesheniniń jetekshi uıymdarynyń basshylarymen kezdesýi de uıymdastyrylǵan.