«Shyǵys – 2019» oqý-jattyǵýyna 4 myńnan astam áskerı qyzmetshi qatysty
Oǵan 4 myńnan astam áskerı qyzmetshi, 1,5 myń qarý-jaraq pen áskerı tehnıka, 20-dan astam ushaq pen maıdandyq jáne áskerlik avıatsııanyń tikushaǵy qatysty.
«Oqý-jattyǵýdyń sheshýshi kezeńinde Qazaqstan men Reseı Qarýly kúshteriniń áskerı qyzmetshileri birlesken kúsh-jigerleriniń arqasynda shartty qarsylastyń kúshterin joıdy. Oqý-jaýyngerlik tapsyrmalardy oryndaý belgilengen bekinisterge armııalyq avıatsııanyń soqqylarynan bastalyp, tankiler men jaıaý áskerdiń jaýyngerlik mashınalarynyń bastyrmalata oq atýymen jalǵasty. Dúrkin oq atýdyń reaktıvti júıeleri shartty qarsylasqa oǵan tıimsiz baǵytta manevr jasaýdy kúshtedi. Eleýli shyǵyndardan keıin qalǵan qarsylas kúshteri pen quraldari barlyq quraldardyń jappaı bastyrmalata oq atýymen, sondaı-aq bólimshelerdiń manevrlik is-qımyldary arqyly joıyldy», delingen habarlamada.
Qarsylastyń bekindisti pýnkter men qorǵanys bólimshelerin aınalyp ótýdegi talpynystary sátsizdikke ushyrady, olardyń jolyn áskerı avıatsııa, atys shabýyldary men batalondy taktıkalyq toptardyń áreketteri kesti.
Oqý-jattyǵýǵa tikeleı basshylyq etken QR QK Qurlyq áskerleriniń Bas qolbasshysy general-maıor Marat Qusaıynov bólimshelerdiń is-qımyldaryna baǵasyn berdi.
«Jeke quram joǵary dalalyq mashyq pen kásipqoılyqty kórsetti. Oqý-jattyǵýdyń mindeti men maqsaty tolyǵymen oryndalyp, komandırler men shtabtar birlesken jaýyngerlik áreketterdi júrgizý men josparlaýda jaqsy praktıkalyq tájirıbe jınady dep oılaımyn» - dedi ol.
Oqý-jattyǵýlar «Shyǵys – 2019» qazaqstandyq polıgonda ótkizilip jáne úsh kezeńnen turatyndyǵyn eske sala keteıik. Olar: áskerlerdi jaýyngerlik daıarlyqtyń joǵarǵy deńgeıine keltirý, birlesken arnaıy áskerı operatsııalardy daıyndaý jáne ótkizý.
Basty maqsat – basqarý organdary men birlesken arnaıy jaýyngerlik áreketterde áskerlerdiń úılesimdiligin, dalalyq mashyqtaryn jetildirýdi, sondaı-aq Qazaqstan men Reseı Qarýly kúshteri arasyndaǵy dostyq qarym-qatynasty nyǵaıtýdy jalǵastyrýdy kózdeıdi.
Oqý-jattyǵý barysynda alǵash ret otandyq «Barys» avtomattandyrylǵan júıesi tekseristen ótkizildi. Bul qural áskerlerdi basqarý júıesin qysqartyp, jedel-taktıkalyq jáne taktıkalyq eseptoptaryn avtomattandyrýǵa jáne áskerlerge áskerı basqarýdyń dabyldaryn jetkizýge múmkindik beredi.
