«Shyǵys-2011» oqý-jattyǵýlary aıaqtaldy

dep habarlaıdy QR Qorǵanys mınıstrliginiń baspasóz qyzmeti.

Oqý-jattyǵýlardyń barysyn baqylaý úshin polıgonǵa Qazaqstan Respýblıkasynyń Qorǵanys mınıstri Ádilbek Jaqsybekov keldi.

Reseı jaǵynan oqý-jattyǵýlarǵa Áskerı áýe kúshteriniń, Áýe desanty áskerleriniń ókilderi, sondaı-aq Ortalyq áskerı okrýginiń jedel toby tartylǵan.

«Shyǵys - 2011» jattyǵýlarynyń keń kólemdiligi sol, onymen bir mezette Qazaqstannyń ár túrli polıgondarynda komandalyq-shtabtyq jáne taktıkalyq-arnaıy oqý-jattyǵýlary ótkizildi. Olarǵa «Shyǵys», «Ońtústik», «Astana» óńirlik qolbasshylyqtarynyń, Áýe qorǵanysy kúshteriniń quramalary men bólimderi, Aeroutqyr áskerleriniń desantty-shabýyldaýshy bólimsheleri qatysty.

«Shyǵys - 2011» jattyǵýlarynyń sheńberinde «Qyzylaǵash» polıgonynda Qazaqstan Áýe qorǵanysy kúshteri men Reseı Áskerı áýe kúshteri «Áýe kúshteri - 2011» birlesken jattyǵýlaryn ótkizdi. Eki el áskerı áýe kúshteriniń basshylyǵy men ushqyshtary birlese qymyldaý arqyly jaqsy tájirıbe jınaqtaı aldy.

Qazirgi tańda Qazaqstan Qarýly Kúshteri áskerı oqytylǵan rezervti daıyndaýǵa barynsha kóńil bólip otyr. Rezervtegilerdi «Shyǵys - 2011» jattyǵýlaryna qatystyrý arqyly komandırler jumyldyrý úderisin saraptaýǵa, sondaı-aq, osy is-sharany tájirıbe túrinde pysyqtaýǵa múmkindik aldy.

Ózderiniń áskerı-eseptik mamandyqtary boıynsha jıyndarǵa shaqyrylǵan qazaqstandyq rezervtegiler úlken tájirıbe jınaqtap, jaýyngerlik tapsyrmalardy sapaly oryndaýǵa qabiletti ekendigin dáleldedi. «Astana» óńirlik qolbasshylyǵynyń «Spassk» oqý polıgonynda bólimshe komandırleri, mergender men granatatqyshtar, mehanık-júrgizýshiler, zenıtshiler men artıllerıster atys jáne arnaıy daıyndyqtan ótti.

Sondaı-aq, «Shyǵys - 2011» jattyǵýlarynyń sheńberinde Aeroutqyr áskerleriniń desantty-shabýyldaýshy bólimshesi jaýyngerlik atystardy qamtyǵan birneshe tapsyrmalardy oryndady.

Olardyń reseılik áriptesteri 31 derbes gvardııalyq desantty-shabýyldaýshy brıgada desantshylary Qazaqstanǵa búgin keldi. Reseı aýmaǵynan áýege kóterilgen olar birneshe saǵat ushýlardan soń birden jattyǵýlarǵa kirisip ketti. Bul sekildi tájirıbeni Reseı desantshylary oqý-jattyǵýlarda alǵash ret qoldanyp otyr.

Qazirgi tańda desantty-shabýyldaýshy bólimsheler eń utqyr jáne barynsha daıyndalǵan bólimshe bolyp tabylady. Az quramda, zamanaýı qarý-jaraqtarmen jaraqtalǵan desantshylar tapsyrmalardy qysqa merzimde oryndaýǵa qabiletti. Qazaqstan men Reseıdiń bólimsheleri UQShU Jedel qımyldaıtyn ujymdyq kúshteriniń quramyna kiretini belgili. Olar úshin mundaı jattyǵýlardyń tapsyrmalaryn oryndaý UQShU Jedel qımyldaıtyn ujymdyq kúshteriniń is-qımyly sheńberindegi tapsyrmalarmen ushtasyp jatyr.

Búgin «Shyǵys» polıgonynda oqý-jattyǵýdyń mazmunyna saı jaýyngerlik is-qımyldar ótkizildi. Qazaqstan jáne Reseı Qarýly Kúshteri ókilderinen quralǵan koalıtsııalyq top shartty áskerı qaqtyǵys oryn alǵan aýmaqtaǵy jaǵdaıdy turaqtandyrýǵa arnalǵan operatsııalardy birlesip júrgizdi.

Jattyǵýlarǵa barlyǵy 3500-den astam áskerı qyzmetshi qatysýda.
500-den asa avtomobıldi jáne saýytty tehnıka tartylǵan. Olar - jaıaý áskerdiń jaýyngerlik mashınalary, T-74 tanki, saýytty transporterler. «Grad», «Gıatsınt», «Msta», «Gvozdıka» syndy artıllerııalyq qondyrǵylar da óz pozıtsııalarynan artıllerııalyq soqqy berdi. Jattyǵýlarǵa Qazaqstan men Reseıden otyzdan astam avıatehnıka qatystyryldy. Olardyń qatarynda Sý-27, Sý-24, Tý-22, Il-76 ushaqtary men Mı-24, Mı-17, Mı-8MT tikushaqtary bar.

Áskerlerdi basqarý negizi - baılanys bolyp tabylatyny belgili. Jattyǵý barysynda Qazaqstan jaǵy dalalyq jaǵdaıda spýtnıktik baılanys ornatyp, Internet jelisin qosty. Dalalyq jaýyngerlik basqarý ortalyǵyndaǵy baıandaýlar men tyńdaýlar zamanaýı beınekonferentsııa jelisin qoldaný arqyly júzege asty.

Jattyǵý qorytyndysy boıynsha Qazaqstan men Reseıdiń áskerı basshylyǵy jattyǵýlardyń basty maqsaty - basqarý organdarynyń ózara
is-qımyly sátti oryndaldy dep sheshti. Komandırler men shtabtar arnaıy operatsııalar júrgizýge tájirıbe jınaqtasa, áskerler ózderiniń dalalyq bilikterin jetildirdi. Sonymen qatar, eki eldiń áskerbasylaryna áskerlerdiń koalıtsııalyq toptaryn qurý, ony jasaqtaý jáne qoldaný máselelerin zertteýge qosymsha múmkindik týdy.