Shyǵaryndylardyń 77%-y energetıka sektoryna tıesili – Zúlfııa Súleımenova
ASTANA. QazAqparat – Energııa óndirý tásilderin transformatsııalaý ekonomıka úshin de, energııaǵa qol jetkizý úshin de mańyzdy. Ony tıimdi ári únemdep qoldanǵan abzal. Bul týraly ekologııa jáne tabıǵı resýrstar mınıstri Zúlfııa Súleımenova málim etti, dep habarlaıdy QazAqparat tilshisi.
«Qazaqstan Parıj kelisimi maqsatyna jetý jónindegi jahandyq kún tártibin tolyq qoldaıdy. Onyń dáleli elimizdiń 2060 jylǵa deıingi kómirtegi beıtaraptyǵyna qol jetkizý strategııasyn bekitýi. Kómirtekti beıtaraptyqqa qol jetkizý energııany óndirýden jáne paıdalanýdan shyǵaryndylardy dekarbonızatsııalaý, energııany paıdalanýmen baılanysty emes, sondaı-aq kómirtekti sińirý men ótemaqyny arttyrý sharalary arqyly qamtamasyz etiledi. Parnıktik gazdar shyǵaryndylarynyń ulttyq ınventarızatsııasynda klımattyń ózgerýi jónindegi halyqaralyq sarapshylar tobynyń jikteýine sáıkes shyǵaryndylardyń 77%-y energetıka sektoryna tıesili», - dedi Zúlfııa Súleımenova elordada ótip jatqan III ECOJER halyqaralyq kongresinde.
Mınıstrdiń málimdeýinshe, energııa óndirý tásilderin transformatsııalaý ekonomıka úshin de, energııaǵa qol jetkizý úshin de mańyzdy.
«Bul oraıda jańartylatyn jáne balamaly energııaǵa kóship, onyń úlesin arttyrý qajet. Sonymen qatar energııa kózderin tıimdi ári únemdep qoldanýdy ádetke aınaldyrǵan jón», - deıdi vedomstvo basshysy.
Odan bólek, elimizdiń bas ekology kómirtekti óndirý jáne saqtaý tehnologııalaryn elektrlendirýdiń mańyzdylyǵyna toqtalyp ótti.
Buǵan deıin habarlaǵanymyzdaı, Astanada III ECOJER halyqaralyq kongresi ótip jatyr.
