Shyǵarmashylyq salasyndaǵy jastarǵa aýyz ashar berdi
ALMATY. Qyrkúıektiń 8-i. QazAqparat. /Erbol Azanbek/ -Keshe Almatyda «Jas Otan» jastar qanaty janyndaǵy «Zańǵar» shyǵarmashylyq birlestigi men «da Qazaqstan» jýrnaly shyǵarmashylyq salasynda júrgen jastardyń basyn qosyp, aýyzashar berdi.
Kóńil qýantarlyǵy jastar arasynda aýyz bekitip, oraza ustaǵandar kóp eken. Sharaǵa 100-ge jýyq jas jýrnalıster, telejúrgizýshiler, ánshiler men kıno, teatr juldyzdary men belgili óner tarlandary qatysty. «Búgingi sharanyń basty maqsaty qasıetti aıda oraza ustaǵan óner men mádenıet, jýrnalıstıka, ádebıet salasynda júrgen tanymal jastarǵa aýyz ashtyrýmen qatar basyn qosyp, tanystyrý. Óıtkeni bolashaq zııaly qaýym osy jastar» dedi «da Qazaqstan» jýrnalynyń bas redaktory Málik Otarbaev.
Shara barysynda Málik Otarbaev pen «Zańǵar» shyǵarmashylyq birlestiginiń tóraǵasy Aıdar Qyryqbaı oraza aıymen quttyqtap, jaqynda Astanada ótken «Jas Qalamger» forýymynyń jumysyna belsene qatysqan Egemen Qazaqstan gazetiniń tilshisi Aınash Esalı men belgili akter Azamat Satybaldyǵa alǵys hat tapsyrdy. Sondaı-aq belgili jas kúıshi Murager Saýranbaev pen jyrshy Aqan Ábdýálıev kúı men jyrdan shashý shashty. «Eýrazııa dıalogy» platformasy týraly derekti fılm kórsetilip, arnaıy shaqyrtylǵan ımamnyń ýaǵyzy tyńdaldy. Shara sońynda quran baǵyshtaldy.
