Shyǵarmashyl jastardyń úni halyqqa tolyq jetpeı jatyr - Marfýǵa Aıtqojına
ALMATY. 3 tamyz. QazAqparat /Erlik Erjanuly/ - "Aqyn- jazýshylar halyqtyń ary men namysy, betke ustar aıbary men aıbyny", - dedi Memlekettik syılyqtyń ıegeri, aqyn Marfýǵa Aıtqojına búgin Almatyda ótken baspasóz máslıhatynda.
«Táýelsizdikten keıin rýhanı erkindigimizdi aldyq. Aıtatyn oıymyzdy ashyq aıtamyz, erkin oılap, erkin jazamyz. Keıde asyra siltep artyǵymen ketip qalatyn jaǵdaılar da bolady. Ol sana-sezimge baılanysty. Kezinde kitabymyz shyǵarda qoljazbasy Jazýshylar odaǵynda talqylanatyn. Ár sektsııada jurt óz pikirin ortaǵa salatyn. Sodan keıin ǵana Jazýshylar odaǵy baspaǵa usynatyn», - deıdi Marfýǵa Aıtqojına.
Onyń aıtýynsha, qoljazbany baspadaǵy bekitilgen redaktorlar da oqyp, óz pikirlerin aıtatyn. Osyǵan oraı oǵan túrli túzetýler jasalyp, qaıta oı eleginen ótkizip baryp qana shyǵarma kitap bop shyǵatyn. Sondyqtan da olar sapaly bolyp, oqyrman arasynda qoldan-qolǵa tarap ketetin. Qazir jaǵdaı múlde ózgerdi. Keńestik dáýirde dúnıege kelgen aǵa urpaqty shyqqan kitaptary men onyń taralymy arqyly jurt jaqsy tanydy.
Aqynnyń sózine qaraǵanda, qazir talantty jastarymyz kóp. Olardyń ishinde jaqsy aqyn-jazýshylar da az emes. Alaıda olar óz oqyrmanyn taba almaýda. Jastardy jurt bilip jatqan joq. Buryn el tanyǵan aqyn-jazýshylarmen mádenıet pen ádebıet basshylary eseptesetin. "Qansha qıyn zaman desek te shaqyryp alyp pikirimizdi suraıtyn, olarǵa sózimiz ótetin edi. Jalpy mádenıet mekemeleriniń tutqasyn ustaǵan adamdar halyq kimdi oqyǵysy, kórgisi keletinin bilip, olarǵa qamqorlyq jasap otyrýy kerek", - deıdi ol.
