Shyǵanaq Bersıevtiń kóshesi atyna saı emes - Shyǵanaqtyń jıeni
AQTÓBE. QazAqparat - Aq tarynyń atasy Shyǵanaq Bersıevke arnalǵan kóshe atyna saı emes. Kóshe óte kishkentaı ári burylysta ornalasqan. Qazirgi ýaqytta Aqtóbe qalalyq máslıhaty tarydan rekord ornatyp, maıdangerlerge azyq bergen Shyǵanaq Bersıetiń kóshesin úlkeıtý boıynsha ótinishti qarap jatyr. Bul týraly Sh.Bersıevtiń jıeni Muhambet Eshmuhanov aıtty, dep habarlaıdy QazAqparat tilshisi.
Aqtóbe qalasynda Oıyl aýdanynyń kúnderi ótip jatyr. Mádenı shara kezinde Shyǵanaq Bersıev eskertkishiniń orny aýystyrylyp, buryn Pýshkın atyndaǵy saıabaqta turǵan músin taryshynyń óz kóshesine qoıyldy.
«Pýshkın saıabaǵy jekeniń menshigi. Shyǵanaq Bersıev eskertkishi aǵashtardyń arasynda kórinbeı qalǵan soń, ony óz kóshesine oryn aýystyrýdy jón kórdik. Aýyl turǵyndary, aqsaqaldar qoldap, usynys iske asty»,- dedi Oıyl aýdany ákiminiń orynbasary Asqar Qazybaev.
Shyǵanaq Bersıev kóshesindegi merekege urpaǵy Muhambet Eshmuhanov keldi.
«Adamǵa nan taýyp berý adamnyń materıaldyq áreketi. Ózgege nan taýyp berý, rýhanı áreket. Shyǵanaq Bersıev ózine ǵana emes, ózgege de nan taýyp bergen kisi. Bersıevtiń eńbegi atalyp ótildi, kórsetkishterin álem biledi. 1946 jyly Aqtóbe qalasyndaǵy Pýshkın saıabaǵynda onyń alǵashqy eskertkishi ornatyldy. Ol kezdegi eskertkish músini taryshynyń aýyryp júrgen kezindegi beınesimen salyndy. Bet-beınesi óte jutań bolǵan soń 2008 jyly eskertkish qaıta ózgertildi. Búgin shaǵyn kóshege kóshirilip otyr. Bul qýanyshty jaǵdaı. Osy kóshe arqyly ótken adam Shyǵanaq Bersıevti kórip, qurmet kórsetip ótedi dep oılaımyz. Shyǵanaq Bersıev kóshesi óte kishkentaı. Aldaǵy ýaqytta Aqtóbe qalalyq ákimdigi kósheni uzartý jóninde sheshim shyǵaramyz dep otyr»,- dedi Sh.Bersıevtiń urpaǵy Muhambet Eshmuhanov.
Aqtóbe qalasynyń eski bóligindegi Shyǵanaq Bersıev kóshesi bar bolǵany birneshe metrge sozylǵan.
Aıta keteıik, ataqty taryshynyń 16 balasy bolǵan. Onyń 6 balasy ǵana er jetip, tórteýi soǵysqa attanǵan, bireýi maıdannan aman-esen oraldy. Qazir Shyǵanaq Bersıevtiń nemereleri Mańǵystaý oblysynda, al qyzynyń balalary Aqtóbe qalasynda turady.
