Shveıtsııa 15 jasqa tolmaǵan balalardyń áleýmettik jelilerge kirýin shekteýi múmkin
ASTANA. KAZINFORM — Shvetsııada 15 jasqa tolmaǵan balalardyń áleýmettik jelilerge qoljetimdiligi shekteledi. Bul shekteý 2028 jylǵy 1 qańtardan bastap kúshine enýi múmkin, dep habarlaıdy Anadoly.
Shvetsııa úkimetine 15 jasqa tolmaǵan balalardyń áleýmettik jelilerdi paıdalanýyna jas shekteýin engizý usynyldy. Alǵashqy aldyn ala esepte bul talap 2028 jyldyń 1 qańtarynan bastap kúshine enýi múmkin ekeni aıtylǵan.
Shvetsııanyń SVT telearnasynyń habarlaýynsha, ótken jyly áleýmettik jelilerge jas shekteýin engizý múmkindigin zerttegen arnaıy komıssııa úkimetke alǵashqy aralyq esebin tapsyrǵan.
Qujatta áleýmettik jelilerdiń balalarǵa tıgizetin keri áserine baılanysty olardyń qoljetimdiligin shekteý qajettigi aıtylyp, eń tómengi jas mólsherin 15 jas dep belgileý usynylǵan.
Jakob Forssmed ulttyq BAQ-qa bergen málimdemesinde bul bastama balalardyń balalyq shaǵyn qaıtarýǵa baǵyttalǵan mańyzdy qadam bolýy múmkin ekenin atap ótti.
— Biz tutas bir urpaqty sheksiz paraqtaýǵa qurban etip jatyrmyz, — dedi mınıstr.
Sonymen qatar, Shvetsııanyń densaýlyó saqtaý agenttigi de ata-analardy balalarymen birge ýaqyt ótkizgen kezde telefondaryn shetke qoıýǵa shaqyrdy. Olar ekranǵa táýeldiliktiń balalarǵa teris áser etetinin eskertip, ata-analarǵa úıdiń keıbir bóligin «telefonsyz aımaq» dep belgileýdi usyndy.
— Balańyzben birge bolǵanda telefondy basqa jerge qoıyńyz, — delingen vedomstvo úndeýinde.
Buǵan deıin Malaızııa eliniń 16 jasqa tolmaǵan balalardyń áleýmettik jelilerge kirýin shekteıtini týraly jazdyq.
