Shveıtsarııanyń vıtse-kantsleri taýda serýendep júrip qaıtys boldy

ASTANA. KAZINFORM – Federaldyq keńestiń baspasóz hatshysy jáne Shveıtsarııanyń vıtse-kantsleri, 55 jastaǵy Andre Sımonatstsı taýda serýendep júrip qaıtys boldy. Bul týraly Swissinfo.ch jazdy. 

A. Sımonatstsıdiń artynda zaıyby men úsh eresek balasy qaldy. 

Andre 2008 jyldyń qarashasynda Federaldyq keńestiń vıtse-kantsleri jáne baspasóz hatshysy bolyp taǵaıyndalǵan. Ol úkimet otyrystaryna qatysyp, hattamalar júrgizip, syrtqy baılanystarmen aınalysty. Federaldy keńsede Sımonatstsı birneshe departamentti jáne Prezıdenttik qyzmetti (Präsidialdienst), Berndegi Federaldy keńseni (Bundeskanzlei) basqardy. 

8 mamyrda ol Federaldyq keńes otyrysynyń qorytyndysy boıynsha úsh baspasóz konferentsııasyn ótkizdi.

Mınıstrler kabınetiniń músheleri baspasóz hatshysynyń kútpegen jerden dúnıeden ozǵanyn «kúızelispen» habarlady.