Shveıtsarııanyń taý-shańǵy kýrortynda bolǵan órt qurbandaryn izdeý jumystary júrip jatyr

ASTANA. KAZINFORM – Vale kantonynyń polıtsııasy mert bolǵandardyń kim ekenin anyqtady. Olardyń biri 16 men 21 jas aralaǵyndaǵy eki jigit pen eki qyz. Olardyń barlyǵy Shveıtsarııa azamattary, dep habarlaıdy DW.

Taǵy eki qurbandy izdeý jumystary jalǵasyp jatyr. Qaıǵyly oqıǵa saldarynan 40 adam mert bolyp, 119 adam jaraqat aldy, 6 adamnyń kim ekeni ázirge belgisiz.

Basylymnyń habarlaýynsha, bardyń ıesi eli-zaıypty Frantsııa azamattary. Kran-Montanada olardyń birneshe ǵımaraty bar. Le Constellation ǵımaratyn olar 2005 jyly satyp alyp, onda jóndeý jumystaryn júrgizgen. Shveıtsarııalyq 20 Minuten portalynyń habarlaýynsha, renovatsııa aıasynda tekpishek kishireıtilgen.

Bul jańa jyldy qarsy alyp jatqan jastardyń dúrbeleńge toly sátte syrtqa shyǵýyn qıyndatyp jibergen.

Sonymen qatar jertóbe tóbesine ornatylǵan akýstıkalyq panelder bengal otshashýlarynan birden tutanǵan. Bar ıesi áıeldiń ózi de qolynan kúıik alǵan. Al onyń jubaıy qojaıyndardyń tergeýmen tolyqtaı yntymaqtasyp otyrǵanyn, barlyq saýalǵa jaýap berip jatqanyn aıtty.

Bar sońǵy on jyl ishinde úsh márte tekserilgen. Ieleriniń aıtýynsha, jóndeý kezinde qoldanystaǵy talaptar tolyq saqtalǵan. Al bardy baqylaýǵa mindetti jergilikti bılik ókilderi nysanǵa qatysty barlyq qujatty tergeý organdaryna tapsyrǵanyn málimdedi.

Vale kantonynyń prokýratýrasy qylmystyq is qozǵady. Alaıda bul is ázirge naqty bir adamdy aıyptaýǵa emes, qasirettiń neden týǵanyn anyqtaýǵa baǵyttalǵan. Elde bes kúndik ulttyq aza tutý jarııalandy.

Osyǵan deıin Shveıtsarııadaǵy kýrortta bolǵan órtten frantsýz fýtbolshysy zardap shekkeni týraly jazdyq.