Shveıtsarııanyń Federaldyq keńesi Madýronyń aktıvterin buǵattady
ASTANA. KAZINFORM — Shveıtsarııanyń Federaldyq keńesi málimdeme jasap, Venesýela prezıdenti Nıkolas Madýronyń barlyq aktıvterine tyıym salǵanyn habarlady. Bul týraly Sınhýa agenttigi jazdy.
Málimdemede tıisti federaldyq zań negizinde Shveıtsarııada N.Madýro men onymen baılanysy bar basqa da tulǵalardyń ıeligindegi barlyq aktıvterdi buǵattaý týraly sheshim qabyldaǵany atap ótildi. Agenttik bul shara qazirgi Venesýela úkimetiniń eshbir múshesine áser etpeıtinin jetkizdi.
Buǵattaý dereý kúshine enedi jáne kelesi eskertýge deıin tórt jyl boıy saqtalady.
Málimdemede aıtylǵandaı, Shveıtsarııa Venesýela tóńiregindegi oqıǵalardy muqııat qadaǵalap, shıelenisti azaıtýǵa, ustamdylyqqa jáne halyqaralyq quqyqty tolyq saqtaýǵa shaqyrady.
Buǵan deıin Nıý-Iorkte ótken alǵashqy sot májilisinde Madýro men onyń áıeli ózderine taǵylǵan kináni moıyndamady.