Shveıtsarııalyqtar budan bylaı jylyna bir márte 13-shi zeınetaqy alady

ASTANA. KAZINFORM – Shveıtsarııalyq saılaýshylar qart adamdardyń ómir súrý deńgeıine qatysty ulttyq referendýmda ózderine qosymsha aılyq zeınetaqy taǵaıyndady, dep habarlaıdy VVS. 

Olar endi jyl saıyn 13-shi zeınetaqy alatyn bolady.

Úkimet zeınetaqy tólemderin arttyrý bıýdjetke tym qymbatqa túsetinin eskertti, biraq referendýmda saılaýshylardyń 60%-ǵa jýyǵy «ıá» dep jaýap berdi.

Shveıtsarııada aı saıynǵy memlekettik zeınetaqynyń tolyq mólsheri — 2550 eýro, biraq kóbi bul soma elde turý úshin jetkiliksiz deıdi.

Shveıtsarııada, ásirese Tsıýrıh jáne Jeneva sııaqty qalalarda turý quny álemdegi eń joǵarylardyń qatarynda.

Atap aıtqanda, barlyǵyna mindetti medıtsınalyq saqtandyrý jarnalary tez ósip, egde jastaǵy adamdar keıde ony tóleýge qınalady.

Jumystan úzilis alǵan áıelder men tolyq jumys ótili joq ımmıgranttar úshin memlekettik jartylaı zeınetaqymen kún kórý qıynǵa soǵýda.

Eldegi kóp adamnyń zeınetaqysy jaqsy, biraq báriniń emes. Sondyqtan 70 jastan asqan shveıtsarııalyqtardyń kóbi jumys isteýge májbúr.

Zeınetaqyny kóbeıtý týraly usynys kásipodaqtardan túskenimen, oǵan úkimet, parlament jáne bıznes ókilderi qarsy bolyp, buny eldiń qaltasy kótermeıtinin aıtty.

Shveıtsarııadaǵy saılaýshylar qarjylyq máseleler boıynsha úkimettiń keńesin jıi tyńdaıdy: birneshe jyl buryn olar jyl saıyn qosymsha demalys aptasyn alyp tastady.

Biraq bul joly olar bılikke senbeı, shveıtsarııalyq tikeleı demokratııa júıesin paıdalanyp, aı saıynǵy qosymsha zeınetaqyǵa daýys berdi.

Referendým nátıjesin olardyń quqyqtaryn qorǵaıtyn shveıtsarııalyq Avivo qaýymdastyǵy «zeınetkerlerdiń tarıhı jeńisi» dep baǵalady.

Bul qadam memlekettik zeınetaqyny jylyna 13 ret tólenetin Shveıtsarııa jalaqy júıesine sáıkestendiredi, al jumysshylar qarasha aıynda eki eselengen tólem alady.