Shveıtsarııalyq kompanııa Qazaqstannyń agroónerkásip keshenine $700 mln-nan astam ınvestıtsııa salmaq

ASTANA. KAZINFORM - Harvest Agro kompanııasy Qazaqstannyń agroónerkásiptik keshenin damytýǵa $700 mln-nan astam qarajat salýdy josparlap otyr. Bul týraly kompanııanyń bas dırektory Dáýlet Ývashev KGIR-2025 alańynda málimdedi, dep habarlaıdy Úkimettiń bapasóz qyzmeti.

Onyń aıtýynsha, kompanııa Qazaqstan naryǵynda 2022 jyldan beri jumys istep keledi, jer men elevator satyp alǵan, sondaı-aq jobanyń birinshi kezeńin júzege asyrýdy bastaǵan, ıaǵnı Qyzylorda oblysynda 20 myń gektar alańda tehnıkalyq qarasora, júgeri jáne soıa ósiredi.

- Bizdiń ınvestor – shveıtsarııalyq kompanııa. Ol Qazaqstanǵa ınvestıtsııa salmaq nıette. Elimizdiń segiz-toǵyz oblysynda 300 myń gektarǵa jýyq sýarmaly jerlerdi ıgerýdi josparlap otyrmyz, — dedi Dáýlet Ývashev.

Ekinshi kezeńde olar 2026 jyldan bastap Almaty, Shyǵys Qazaqstan, Abaı jáne Jetisý oblystarynda aýyl sharýashylyǵy ónimderin qaıta óńdeý zaýyttaryn salýdy jáne 50 myń gektar jerdi ıgerýdi josparlap otyr.

Dáýlet Ývashev óziniń Harvest Agro kompanııasy Kazakh Invest-pen tyǵyz yntymaqtastyqta jumys istep kele jatqanyn atap ótti, olar jobalarǵa qoldaý bildirip, bıznes protsesti súıemeldep keledi. Sondaı-aq ákimdiktermen de memorandýmdarǵa qol qoıylyp, bıznes-josparlar men qarjylyq úlgiler daıyndalǵan.

Ósirilgen ónim negizinen Qazaqstannyń ishki naryǵyna, al bir bóligi eksportqa baǵyttalmaq.

- Soıa kontsentraty, amınoqyshqyldar óndiriletin bolady. Shrot pen kúnjara jemge ketedi. Tehnıkalyq qarasoradan biz qurylys ındýstrııasy úshin panelder, jylý ustaǵyshtar jáne plıtalar shyǵarýdy josparlap otyrmyz. Biz tereń qaıta óńdeý deńgeıine deıin óńdep, óndirgen ónimderimizdi ishki naryqqa jáne eksportqa shyǵaratyn bolamyz, — dep atap ótti Dáýlet Ývashev.

Osyǵan deıin Almaty men Shveıtsarııa arasyndaǵy saýda aınalymy 303 myń dollarǵa jetkeni týraly jazdyq.