Rıdder turǵyndary Harıýzovka ózenindegi kópirdiń apatty jaǵdaıda turǵanyna shaǵymdandy

ÓSKEMEN. KAZINFORM – Shyǵys Qazaqstan oblysy Rıdder qalasynyń turǵyndary Harıýzovka ózenindegi kópir taıanyshy maıysyp, qulaıyn dep turǵanyn aıtyp, dabyl qaqty. Bul kópir qaladaǵy Geolog shaǵyn aýdanynda ornalasqan. Kópirmen arly-berli júretin halyq árkez ol qulap kete me dep qorqatyndyqtaryn jetkizdi.

— Ásirese qart kisiler júrekterin shúberekke túıip ótedi. Kópirdiń apatty jaǵdaıda turǵany anyq kórinedi. Taıanyshy maıysyp, qulaıyn dep turǵandyqtan júris-turysy qıyndaǵan ata-apalarymyz odan ustana da almaıdy. Bul óte qolaısyz ǵoı! Nege jergilikti bılik bul jaǵdaıdy retke keltirmeıdi, — dep narazylyǵyn bildirdi rıdderlikter. 

Osy rette, Kazinform tilshisi qala ákimdigine resmı salaýhat joldady. 

— Harıýzovka ózeni arqyly ótetin kópirdiń salynǵan jyly muraǵattyq derekterdiń bolmaýyna baılanysty belgilenbegen. Bul kópirdiń jalpy usyndyǵy — 19 metr. 2026 jyly Rıdderdegi barlyq qoldanystaǵy kópirlerge tehnıkalyq baıqaý jumystary júrgizilip, sodan keıin ǵana kópirlerdiń naqty jaǵdaıy anyqtalady. Dál qazir Harıýzovka ózeni arqyly ótetin kópirdi kúrdeli jóndeý týraly derek joq, — dep jaýap berdi Rıdder qalasy ákiminiń orynbasary Qanybek Tóleýhan.

Demek, bul kópirdiń naqty jaǵdaıyna qatysty baǵa kelesi jyly ǵana berilmek. Al onyń kúrdeli jóndeletini-jóndelmeıtini de soǵan baılanysty bolatyn sekildi.

Eske salsaq, osyǵan deıin Óskemende eki jańa kópir salynatyndyǵy habarlanǵan.