Shveıtsarııadaǵy taý shańǵysy kýrortyn qalyń qar basty
ASTANA. KAZINFORM – Shveıtsarııa men Soltústik Italııadaǵy Alpi taýlarynyń edáýir bóligin qalyń qar japty, dep habarlaıdy Kazinform agenttigi BILD basylymyna silteme jasap.
Tsermatt atty tanymal taý shańǵysy kýrorty qatty zardap shekti. Qazirgi ýaqytta ol syrtqy álemnen tolyqtaı oqshaýlanǵan. 2500 metr bıiktikte qardyń qalyńdyǵy bir metrge deıin jetken, al eldi mekenniń ózinde jaryq sónip qalǵan.
Tsermattqa aparatyn jol jabyq, temirjol qatynasy toqtatylǵan ıaǵnı, kýrort oqshaý kúıde qaldy. Jergilikti bılik turǵyndarǵa úıde bolýǵa shaqyryp, SMS habarlamalar jiberdi. Jergilikti BAQ málimetinshe, juma kúni tańerteńge deıin jaryq qalpyna keltirilmegen, sebebi muz ben qar saldarynan elektr jelileri zaqymdanǵan, bul apatty joıýǵa kedergi keltirip jatyr.
Kelýshilerdiń negizgi qajettilikterin qamtamasyz etý úshin beısenbi keshke bir sport zalynda ystyq sorpa berilgen. Sondaı-aq uıaly telefondardy qýattaýǵa arnalǵan qoǵamdyq stantsııa ornatylǵan. Alpi taýlaryndaǵy eń bıik Matterhorn Ski Paradise shańǵy aımaǵynda barlyq kótergish eki kúnge toqtatyldy.
Kanton bıligi turǵyndarǵa ormanda, aǵashtardyń janynda jáne sý qoımalary mańynda serýendeýden, sondaı-aq shańǵy týrlarynan bas tartýǵa keńes berdi.
Aıta ketelik keshe Katonqaraǵaıda da qar jaýǵan edi.