Shveıtsarııadaǵy referendým: áıelder áskerge barmaıtyn boldy
ASTANA. KAZINFORM — Shveıtsarııada erlerge arnalǵan mindetti áskerı nemese balamaly azamattyq qyzmetti almastyratyn jalpyǵa birdeı azamattyq qyzmet jáne baılar úshin muragerlikke salyq engizý týraly referendýmdar sátsiz aıaqtaldy, dep habarlaıdy DW aqparat agenttigi.
Bılik jeksenbi kúni daýystardy sanaý aıaqtalǵanǵa deıin bastamalar kantondardyń kóbinde qoldaý tappaǵanyn habarlady.
Shveıtsarııa kantondarynyń kóbinde usynystardy qoldaý bastamalardy qabyldaý sharttarynyń biri boldy.
SRF qoǵamdyq-quqyqtyq telearnasy jarııalaǵan aldyn ala qorytyndylarǵa sáıkes, shveıtsarııalyq saılaýshylardyń 84%-y mindetti memlekettik qyzmetke qarsy boldy. Referendýmǵa qatysýshylardyń 79%-y dáýletti adamdar úshin muragerlik salyq engizý usynysyn qabyldaǵan joq.
Shveıtsarııada jalpyǵa ortaq azamattyq qyzmet týraly bastama
Shveıtsarııadaǵy jalpyǵa ortaq azamattyq qyzmet bastamasy áskerı qyzmetti áskerı kúshterde, apattan qorǵaý qyzmetterinde, densaýlyq saqtaý nemese áleýmettik salalarda bolsyn barlyq azamattar úshin mindetti etýdi shamalaǵan. Qazirgi kezde Shveıtsarııada mindetti qyzmet tek er adamdarǵa ǵana qatysty, bul rette olar áskerı jáne balama azamattyq qyzmet arasynda tańdaý jasaı alady. Áıelder áskerı qyzmetti nıeti boıynsha tańdaı alady.
Shveıtsarııa úkimeti jáne parlamenttegi partııalardyń kópshiligijalpyǵa ortaq azamattyq qyzmetti engizý ıdeıasyn qabyldamaı, bul eńbek naryǵyn tym kóp jumysshydan aıyrady dep málimdedi. Sonymen qatar, synshylar mundaı bastamany qarjylandyrý tym qymbatqa túsetinin atap ótti. Shveıtsarııada jalpyǵa ortaq azamattyq qyzmetti engizýdi tek Jasyl lıberaldyq partııa (GLP) jáne Evangelııalyq halyqtyq partııa (EVP) qoldady.
Shveıtsarııada baılarǵa muragerlik salyǵyn engizý bastamasy
Shveıtsarııada baılarǵa muragerlik salyǵyn engizý bastamasyn Sotsıal-demokratııalyq partııanyń (Jungsozialisten, JUSO) jastar uıymy kóterdi. Onda 50 mln shveıtsarııa franki (shamamen 54 mln eýro) nemese odan da kóp baılyqty mura etetinder «klımattyq daǵdarysqa qarsy áleýmettik ádil kúres jáne tutastaı alǵanda ekonomıkadaǵy qajetti ózgerister» úshin sol somanyń 50%-ynan bas tartýy kerek dep usynyldy.
Mundaı salyqtyń engizilýine birqatar saıası partııalar men ekonomıkalyq birlestikterdi qosa alǵanda kóbi qarsy boldy. Olar, qosymsha salyq aýyrtpalyǵy baı Shveıtsarııa azamattaryn shetelge kóshýge májbúrleıtinin, bul salyq túsimderiniń jalpy tómendeýine ákeletinin eskertti.
Qoldanystaǵy zańnamaǵa sáıkes, qaıtys bolǵan adamnyń jubaılary men tikeleı urpaqtary Shveıtsarııa kantondarynyń kópshiliginde muragerlik salyqtan bosatylady. Basqa muragerler úshin kantonǵa baılanysty ártúrli erejeler bar.
Osyǵan deıin Qazaqstan men Shveıtsarııa arasyndaǵy taýar aınalymy 1,1 mlrd dollar bolǵanyn habarlaǵan bolatynbyz.
Kazinform tilshisi Qazaqstan men Shveıtsarııa arasyndaǵy qarym-qatynastyń negizgi baǵyttary men bolashaǵyn saralap kórdi.