Shveıtsarııadaǵy kýrortta bolǵan órtten frantsýz fýtbolshysy zardap shekti

ASTANA. KAZINFORM — Shveıtsarııadaǵy kýrortta ornalasqan «Le Constellation» barynda shyqqan órt saldarynan zardap shekkenderdiń arasynda Frantsııanyń «Mets» fýtbol klýbynyń 19 jastaǵy oıynshysy Tahırıs Dos Santos bar. Bul týraly Kazinform menshikti tilshisi habarlaıdy.

Frantsýz BAQ-tarynyń málimetinshe, jas fýtbolshy aýyr jaraqat alyp, Germanııanyń Shtýtgart qalasyndaǵy kúıik shalǵan naýqastardy emdeýge mamandanǵan medıtsınalyq mekemege jetkizilgen.

Onyń agenti Krıstof ıÝttonyń aıtýynsha, dárigerlerdiń bastapqy boljamyna qaramastan, fýtbolshy jasandy tynys alý apparatyna qosylmaǵan.

— Eń bastysy, dárigerler kútkendeı, ony ókpeni jasandy jeldetý apparatyna qosýdyń qajeti bolmady. Ókpesiniń tynys alý kólemi ózdiginen qalpyna keldi, sondyqtan ómirdi qamtamasyz etý apparaty qajet emes. Qazir naqty boljam aıtýǵa áli erte. Ony kúıik bólimshesine aýystyrǵanyn eskersek, Tahırıstiń fızıkalyq jaǵdaıy, ókinishke qaraı, óte aýyr ekenin túsinýge bolady, — dedi agenti.

Eske sala keteıik, Shveıtsarııanyń Krans-Montana kýrortynda bolǵan órt saldarynan shamamen 100 adam aýyr hálde jatyr. Qaıǵyly oqıǵa kezinde 40-tan astam adam qaza tapqan.