Shveıtsarııadaǵy taý shańǵysy kýrortyndaǵy órtten kóz jumǵandardyń sany 40-qa jetti
JENEVA. KAZINFORM — Shveıtsarııanyń ońtústik-batysyndaǵy Kran-Montana taý shańǵysy kýrortyndaǵy bir barda bolǵan órtten shamamen 40 adam qaza taýyp, 110-nan astam adam jaraqat aldy. Bul týraly jergilikti polıtsııa beısenbi kúni habarlady, dep jazdy Sınhýa.
Vale kanton polıtsııasynyń bastyǵy Frederık Gızler sol kúnniń ekinshi jartysynda ótken baspasóz konferentsııasynda aqparatty rastady.
— Bizdiń esebimizge sáıkes, shamamen 40 adam qaza tapty. Taǵy 115 adam zardap shekti, olardyń kóbi aýyr halde, — dedi F. Gızler.
Aldyńǵy habarlamada jergilikti BAQ polıtsııaǵa silteme jasap, jańa jyl túni Kran-Montana ortalyǵyndaǵy bir barda qatty órt shyqqanyn habarlaǵan. Órt týraly habar jergilikti ýaqyt boıynsha 01:30-dan keıin shuǵyl qyzmetke túsken. Birneshe kantonnan kelgen ondaǵan jedel járdem kóligi men birneshe tikushaq oqıǵa ornyna jetken.
Shveıtsarııa Konfederatsııasynyń prezıdenti Gı Parmelen bul oqıǵany el tarıhyndaǵy eń qaıǵyly tragedııalardyń biri dep atady.
Vale kantondyq bas prokýrory Beatrıs Pıllý órttiń naqty sebepterin áli aıtýǵa erte ekenin jetkizdi.
BAQ derekteri boıynsha, oqıǵa kezinde barda qansha adam bolǵany belgisiz. Vale kanton ákimshiligi tótenshe jaǵdaı engizilgenin jarııalady.
Eske sala keteıik, Shveıtsarııadaǵy kýrortta bolǵan órtten frantsýz fýtbolshysy zardap shekkenin jazǵan edik.