Shveıtsarııadaǵy Kran-Montana kýrortyndaǵy órt qurbandaryna ótemaqy kólemi belgili boldy

ASTANA. KAZINFORM – Shveıtsarııanyń Kran-Montana kýrortynda bolǵan órt saldarynan zardap shekkenderge beriletin qarjylaı ótemaqy mólsheri jarııalandy, dep habarlaıdy Kazinform agenttiginiń menshikti tilshisi.

Shveıtsarııanyń Vale kantonynyń úkimeti órtten zardap shekken 116 adamnyń árqaısysyna, sondaı-aq qaza tapqan 40 adamnyń otbasylaryna 10 myń shveıtsar frankinen (shamamen 6 mln 300 myń teńge) qarjylaı kómek bólýdi mindetine aldy.

Frantsııanyń Le Parisien basylymynyń málimetinshe, qoǵamdyq suranysqa baılanysty qaıyrymdylyq qarajatyn jınaý úshin arnaıy esepshot ashylǵan. Aldaǵy ýaqytta jınalǵan qarajat Vale kantonynyń basqarýyndaǵy arnaıy qorǵa aınaldyrý josparlanyp otyr.

Sonymen qatar Shveıtsarııada kópshilik jınalatyn qoǵamdyq oryndarda pırotehnıkalyq buıymdardy qoldanýǵa tyıym salý týraly sheshim qabyldandy.

Eske salaıyq, jańa jyl túni Shveıtsarııanyń Kran-Montana qalasynda ornalasqan Le Constellation barynda órt shyqqan bolatyn. Atalǵan derek boıynsha mekeme ıelerine qatysty qylmystyq is qozǵaldy.

Tótenshe jaǵdaı saldarynan shamamen 40 adam qaza taýyp, taǵy 100-ge jýyq adam túrli deńgeıde jaraqat aldy.