Shveıtsarııadaǵy elıtalyq kýrortta merekelik tún adam ólimimen aıaqtaldy

ASTANA. KAZINFORM — Shveıtsarııanyń Kran-Montana taý shańǵysy kýrortynda ótken túni jarylys bolyp, adam shyǵyny tirkeldi. Birneshe adam óte aýyr kúıik pen jaraqat alǵan. Bul týraly BILD habarlady.

Shveıtsarııalyq Blick basylymynyń málimetinshe, shamamen saǵat 01:30-da Jańa jyldy toılaý kezinde Le Constellation oıyn-saýyq ornynan órt shyqqan. Atalǵan mekeme jertólede ornalasqan. Órttiń shyǵýyna kontsert barysynda qoldanylǵan pırotehnıkalyq quraldar sebep bolýy múmkin. Bul nusqany birneshe kýáger RhoneFM jergilikti radıostantsııasyna da rastaǵan.

Qutqarý qyzmetteri aýqymdy operatsııa júrgizip jatyr: oqıǵa ornynda jedel járdem kólikteri men tikushaqtar jumyldyrylǵan. Polıtsııanyń habarlaýynsha, órt tańǵa jýyq baqylaýǵa alynǵan.

Qaza tapqandardyń naqty sany ázirge belgisiz, alaıda ol óte kóp dep baǵalanyp otyr. RhoneFM derekterine sáıkes, ondaǵan adam qaza tabýy múmkin.

Al Blick jazýynsha, anonımdi derekkóz shamamen 40 qurban týraly aıtqan. Polıtsııa málimetinshe, jarylys kezinde jertóledegi mekemede 100-den astam adam bolǵan.

Kran-Montana Vale kantonynda ornalasqan jáne kóptegen tanymal qonaqtary bar elıtalyq kýrort sanalady. Merekelik kúnderi kýrort ádette lyqa tolady: shamamen 10 myń turǵynǵa 2600 qonaqúı orny keledi.

Budan buryn Shveıtsarııa prezıdenti elge mıllıardtaǵan shyǵyn keltirdi dep aıyptalyp otyrǵanyn jazǵan bolatynbyz.