Shveıtsarııada sý tasqyny kezinde úsh adam iz-túzsiz joǵalyp ketti
BERN. KAZINFORM - Juma kúni Shveıtsarııanyń ońtústik-shyǵysynda tolassyz jaýǵan jańbyrdan sý tasqyny oryn alyp, bılik ókilderi aımaqtan adamdardy evakýatsııalaýǵa májbúr boldy.
Eýropalyq BAQ-tyń habarlaýynsha, Shveıtsarııanyń ońtústik-shyǵysynda qatty naızaǵaı men jańbyrdan keıin Graýbıýnden kantonynda úsh adam iz-túzsiz joǵalyp ketti. Tórtinshi adam — joǵalyp ketken áıel tiri tabyldy.
Bılik Konfederatsııanyń eskertý qyzmeti arqyly zardap shekken aımaqta birneshe sý tasqyny tirkelgenin, Mezoltsına alqabynda taǵy sý tasqyny bolatynyn eskertti.
«Birneshe ózen arnasynan asyp, juma kúni keshke jaǵdaı ýshyǵa tústi», — delingen kantondyq polıtsııanyń baspasóz habarlamasynda.
Jergilikti polıtsııa seriktesterimen birlesip qutqarý operatsııasyn uıymdastyryp, keıbir adamdardy evakýatsııalaýǵa týra keldi.
Shveıtsarııanyń basqa aımaqtarynda, Vale kantonyndaǵy Tsermatt taý shańǵysy kýrorty juma kúni tústen beri sý tasqyny qaýpine baılanysty álemmen baılanysyn úzip, temirjol jáne avtomobıl qatynasy toqtady.
Sońǵy kúnderi aımaqta soqqan qatty daýyl bıyl mol bolǵan qardyń erýimen qosylyp, Vısp ózeni arnasynan asyp ketti, Matterhorn etegindegi aýyldy sý basty.
Beısenbiden beri jaýǵan jańbyr, sondaı-aq qardyń erýi men topyraq juma kúni Vale bıligin eskertý deńgeıin kóterýge ıtermeledi.
«230-ǵa jýyq adam evakýatsııalandy», — dep habarlady kantondyq baqylaý organy juma kúni.
