Shveıtsarııada relster arasyna ornatylǵan kún panelderi sátti synaqtan ótti
ASTANA. KAZINFORM — Shveıtsarııada temirjol relsteriniń arasyna ornatylǵan kún panelderin paıdalaný jobasynyń synaqtary sátti aıaqtaldy. Jańa tehnologııaǵa basqa elder de qyzyǵýshylyq tanytyp otyr, dep habarlaıdy DW.
Sun-Ways startapy poıyzdardy temirjol relsteriniń arasyna ornatylatyn arnaıy kún panelderi arqyly óndirilgen elektr energııasymen qamtamasyz etýdi usynady. Ótken jyldyń qyrkúıeginde mundaı panelder Shveıtsarııanyń Bıýtt qalasy mańyndaǵy uzyndyǵy 100 metr bolatyn temirjol ýchaskesine ornatylǵan.
Bastapqyda tájirıbe úsh jylǵa josparlanǵan bolatyn. Alaıda alǵashqy nátıjelerdiń sátti bolýy óńir bıligine bul júıeni turaqty negizde engizý múmkindigin qarastyrýǵa negiz boldy.
Joba iske qosylǵaly beri atalǵan ýchaskedegi 48 kún paneli shamamen 16 myń kılovatt-saǵat elektr energııasyn óndirgen. Bul jaryqtandyrý, sý jylytý, jylytý júıesi men turmystyq tehnıkasy tolyq elektr qýatymen jumys isteıtin bir úı sharýashylyǵynyń bir jyldyq tutynýyna teń.
Sonymen qatar jobanyń birqatar kemshilikteri de bar. Ádette kún panelderi tıimdiligin arttyrý úshin 35 gradýsqa deıin eńkeıtilip ornatylady. Al temirjolda mundaı múmkindik joq. Degenmen Sun-Ways mamandary panelderdiń kólbeýsiz ornalasýy energııa óndirýdi nebári shamamen 10 paıyzǵa ǵana tómendetetinin aıtady.
Taǵy bir másele – poıyzdardyń qozǵalysy saldarynan panelderdiń lastanýy. Bul olardyń tıimdiligin tómendetýi múmkin. Osyǵan baılanysty startap poıyzdardyń aldyńǵy jáne artqy bóligine panelderdi tazalaıtyn arnaıy şetkalar ornatýdy usynǵan.
Al Halyqaralyq temirjol odaǵy jobaǵa qatysty ózge de qaýipterge nazar aýdardy. Atap aıtqanda, panelderde mıkrojaryqtardyń paıda bolýy órt qaýpin arttyrýy múmkin. Sondaı-aq olardyń shaǵylysy mashınısterdiń jumysyna kedergi keltirýi yqtımal.
Óz kezeginde Sun-Ways kompanııasy panelderdiń asa berik materıaldardan jasalǵanyn jáne olardyń betine shaǵylysýǵa qarsy arnaıy jabyn jaǵylatynyn málimdedi.
Qazirgi ýaqytta Sun-Ways Italııanyń ulttyq temirjol ınfraqurylymy operatory Rete Ferroviaria Italiana-men jumys isteıtin kompanııamen yntymaqtastyq týraly kelisimge qol qoıǵan. Sondaı-aq startap Ońtústik Koreıada temirjolǵa kún panelderin ornatýǵa ruqsat alyp, Nıderland, Qytaı, Úndistan jáne Sıngapýr kompanııalarymen kelissózder júrgizip jatyr.
