Shveıtsarııada órtengen bardyń ıesiniń Frantsııada sottalǵany belgili boldy

ASTANA. KAZINFORM — Shveıtsarııanyń Kran-Montana qalasynda jańa jyl túni órtengen Le Constellation barynyń ıesi Jak Morettı Frantsııada sýtenerlik pen alaıaqtyq baptary boıynsha kináli dep tanylǵan, dep habarlaıdy Anadolý agenttigi.

Frantsııalyq buqaralyq aqparat quraldarynyń habarlaýynsha, 2008 jyly Morettı Frantsııanyń Ansı qalasyndaǵy qylmystyq sottyń úkimimen sottalǵan.

Sot úkimine sáıkes, Morettı bir jylǵa bas bostandyǵynan aıyrylǵan, onyń ishinde segiz aıy shartty jaza bolǵan. Sondaı-aq úkimde oǵan Frantsııa aýmaǵynda kásipkerlik qyzmetpen aınalysýǵa tyıym salý qarastyrylǵan.

2010 jyly Morettı taǵy da Frantsııanyń Bastııa qalasyndaǵy sotta alaıaqtyq isi boıynsha kináli dep tanylǵan.

Kran-Montanada bolǵan qandy órtten keıin bar ıesiniń bostandyqqa shyǵarylýy Shveıtsarııa qoǵamy men saıasatkerleri tarapynan qatty narazylyq pen synǵa ushyrady.

Qurbandardyń arasynda kámeletke tolmaǵandar da bolǵan, olardy tyıym salynǵanyna qaramastan, mekemege kirgizgen degen boljam bar.

Eske sala ketsek, órt saldarynan 40 adam qaza tapty, taǵy 119 adam qatty kúıikpen jáne bir-birin taptaýynan alǵan jaraqattarymen aýrýhanaǵa jatqyzyldy. 

Osy qaıǵyly oqıǵaǵa baılanysty Shveıtsarııada bes kúndik aza tutý jarııalandy.