Shveıtsarııada Qazaqstannyń mádenı-iskerlik ortalyǵy ashyldy
ASTANA. KAZINFORM — Shveıtsarııanyń Shaffhaýzen qalasynda Shveıtsarııa–Qazaqstan mádenı-iskerlik ortalyǵy ashyldy. Ortalyq eki el arasyndaǵy saýda-ekonomıkalyq jáne mádenı yntymaqtastyqty damytý maqsatynda quryldy, dep habarlaıdy Saýda jáne ıntegratsııa mınıstrliginiń baspasóz qyzmeti.
Ortalyq qyzmetiniń negizgi baǵyttarynyń biri qazaqstandyq ónimderdi Shveıtsarııa jáne basqa da halyqaralyq naryqtarǵa shyǵarý bolmaq. Atap aıtqanda, metallýrgııa, agroónerkásip, tamaq jáne hımııa ónerkásibi ónimderin ilgeriletýge basymdyq beriledi. Ortalyq qazaqstandyq óndirýshiler men sheteldik ımporttaýshylar jáne saýda jelileri arasynda tikeleı iskerlik baılanystar ornatýǵa, sondaı-aq ınvestıtsııalyq yntymaqtastyqty damytýǵa járdemdesedi. Sonymen qatar ortalyq qyzmetiniń jeke bir baǵyty Qazaqstannyń tarıhy men mádenıetin tanytýǵa arnalady.
Ashylý rásimine Qazaqstan Respýblıkasynyń Saýda jáne ıntegratsııa mınıstri Arman Shaqqalıev, Shaffhaýzen kantonynyń bılik ókilderi, Qazaqstannyń Shveıtsarııadaǵy Elshiliginiń, «QazTrade» AQ-nyń ókilderi, qazaqstandyq jáne shveıtsarııalyq kásipkerler, sondaı-aq ǵylymı qaýymdastyq ókilderi qatysty.
Іs-sharada sóz sóılegen Arman Shaqqalıev Qazaqstannyń Shveıtsarııamen ekonomıkalyq yntymaqtastyqty keńeıtýge, onyń ishinde tehnologııalar tartýǵa, óndiristik quzyretterdi damytýǵa jáne uzaq merzimdi birlesken jobalardy iske asyrýǵa múddeli ekenin atap ótti.
«QazTrade» AQ bas dırektory Nurlan Qulbatyrov Qazaqstannyń eksporttyq jáne ınvestıtsııalyq áleýetin, sondaı-aq otandyq óndirýshilerdiń Shveıtsarııa naryǵyna shyǵýyn qoldaýǵa arnalǵan qoldanystaǵy quraldardy tanystyrdy.
Eurasia Group AG kompanııasynyń prezıdenti M. Zahın ortalyqty qurýdaǵy maqsattar men onyń eki el kásipkerleri arasynda iskerlik baılanystar ornatýdaǵy róli týraly baıandady.
Shaffhaýzen kantonynyń ókilderi Qazaqstanmen bıznes, aýyl sharýashylyǵy jáne aýyl sharýashylyǵy ónimderin óńdeý salalaryndaǵy yntymaqtastyqtyń keleshegine toqtaldy. Іs-shara barysynda ǵylymı, bilim berý jáne mádenı baılanystardy damytý múmkindikteri de talqylandy.
Qazaqstannyń Shveıtsarııadaǵy elshisi Q. Sarjanov ekijaqty ekonomıkalyq yntymaqtastyqtyń negizgi kórsetkishterin tanystyrdy. 2005 jyldan beri Shveıtsarııanyń Qazaqstanǵa salǵan ınvestıtsııalarynyń kólemi 36,5 mlrd AQSh dollarynan asty. 2025 jyldyń qorytyndysy boıynsha eki el arasyndaǵy taýar aınalymy 1,5 mlrd dollardy qurady.
Ortalyqty qurý bastamasyn Qazaqstannyń aýyl sharýashylyǵy tehnıkasy naryǵynda jumys isteıtin Eurasia Group kompanııasy kóterdi. Kompanııalar tobynyń Qazaqstanǵa salǵan ınvestıtsııalarynyń jalpy kólemi 88,5 mln dollardy qurady. Bul qarajat servıstik ınfraqurylymdy damytýǵa, jabdyqtar satyp alýǵa jáne mamandar daıarlaýǵa baǵyttalǵan. 2025 jyldan bastap kompanııa Qazaqstanda John Deere aýyl sharýashylyǵy tehnıkasynyń óndirisin jergiliktendirýdi qolǵa aldy.
Buǵan deıin Shveıtsarııa bıznesi Qazaqstanǵa nege qyzyǵýshylyq tanytyp otyrǵanyn jazǵanbyz.
