Shveıtsarııada halyq sanyna shekteý qoıý týraly usynys qyzý talqylanyp jatyr

ASTANA. KAZINFORM — El halqynyń sanyn 10 mıllıon adammen shekteý týraly usynysty ońshyl-konservatıvti Shveıtsarııa halyq partııasy kóterdi, dep habarlaıdy DW.

Ońshyldardyń pikirinshe, kóshi-qonnyń artýy halyq sanynyń jyldam ósýine alyp kelip, bul turǵyn úı sektorynyń jaǵdaıyna, jergilikti kólik júıesine jáne kommýnaldyq qyzmetkge keri áserin tıgizip otyr.

20 Minuten jáne Tamedia gazetteriniń tapsyrysy boıynsha júrgizilgen saýalnama nátıjesine sáıkes, Shveıtsarııa turǵyndarynyń 48 paıyzy bul jospardy qoldap daýys berýge nıetti. Al respondentterdiń 41 paıyzy oǵan qarsy ekenin bildirgen.

Jospardy qoldaýshylar bul másele boıynsha referendým maýsym aıynda ótýi tıis dep sanaıdy. Alaıda úkimet ázirge muny resmı túrde rastaǵan joq. Shveıtsarııanyń basqa saıası partııalary bul usynysty qabyldamaýǵa shaqyryp otyr. Olardyń pikirinshe, qatań shekteýler ekonomıka men halyqtyń ál-aýqatyna zııan keltiredi, óıtkeni shveıtsarııalyq kompanııalar sheteldik jumys kúshine táýeldi.

2025 jyldyń kóktemindegi málimet boıynsha, Shveıtsarııa halqynyń sany 9 048 900 adamǵa jetken. Shveıtsarııalyq ońshyldar eger halyq sany 9,5 mıllıonnan asyp ketse, bılik elge kóshi-qondy yntalandyratyn halyqaralyq kelisimderdi buzýy tıis dep esepteıdi.

Aıta ketelik Shveıtsarııadaǵy referendým: áıelder áskerge barmaıtyn bolǵany týraly jazǵan edik.