Shveıtsarııada halyq sanyn shekteý týraly referendým ótedi

ASTANA. KAZINFORM –  Mıgranttar aǵynyn shekteý maqsatynda Shveıtsarııadaǵy ásire ońshyl kúshter halyq sanyna qatysty referendým uıymdastyrdy, dep habarlaıdy DW.

Referendým 14 maýsymda Shveıtsarııa halyq partııasynyń (ShHP) usynysy boıynsha ótedi.

Usynysqa sáıkes, el halqynyń sany 2050 jyldan keıin 10 mıllıon adamnan aspaýy tıis. Bul kórsetkish tek jańa týǵan náresteler sanynyń kóp bolýy nátıjesinde ǵana artýy múmkin.

Eger usynys qabyldanyp, kórsetilgen merzimge deıin Shveıtsarııa halqynyń sany 9,5 mıllıonnan asyp ketse, bılik «halyq sanynyń ósýine yqpal etetin halyqaralyq kelisimderdi qaıta qaraýǵa» mindetteledi. Eń aldymen bul bosqyndarǵa baspana berý jáne otbasy múshelerin biriktirý maqsatynda Shveıtsarııaǵa kóshirý salasyna qatysty kelisimderge qatysty bolmaq. Eger bul sharalar jetkiliksiz bolsa, Eýroodaqpen erkin júrip-turý týraly kelisimdi buzýǵa týra keledi.

Shveıtsarııa parlamenti depýtattarynyń basym bóligi bul bastama «eshbir máseleni sheshpeıdi, kerisinshe jańa problemalar týyndatady» dep esepteıdi. Al bastamany qoldaýshylar ony kóshi-qondy baqylaýdyń «aqylǵa qonymdy quraly» dep sanaıdy. Qazirgi ýaqytta Shveıtsarııa halqynyń sany shamamen 9 mıllıon adam.

Aıta ketelik Shveıtsarııadaǵy Kran-Montana kýrortyndaǵy órt qurbandaryna ótemaqy kólemi belgili bolǵan edi.