Shveıtsarııada halyq sanyn 10 mıllıonmen shekteý bastamasy ótpeı qaldy
ASTANA. KAZINFORM — Shveıtsarııa azamattary referendým barysynda el halqynyń sanyn 2050 jylǵa qaraı 10 mıllıon adamnan asyrmaý týraly bastamany qoldamady. Bul týraly Le Temps basylymyna silteme jasap, BELTA jazdy.
Basylym jarııalaǵan aldyn ala málimetterge sáıkes, daýystardy sanaý qorytyndysy boıynsha saılaýshylardyń 54,8 paıyzy bastamaǵa qarsy daýys bergen. Al 45,2 paıyzy ony qoldaǵan.
Referendým ótkizý bastamasyn Shveıtsarııa halyqtyq partııasy kótergen bolatyn. Usynysqa sáıkes, el halqynyń sanyn 2050 jylǵa deıin 10 mıllıon adamnan asyrmaý úshin birqatar sharalardy júzege asyrý kózdeldi. 2025 jyldyń sońyndaǵy málimet boıynsha, Shveıtsarııa halqy shamamen 9,1 mıllıon adamdy quraǵan.
Bastama avtorlary sońǵy jyldary jappaı kóshi-qonnyń artýy qylmys deńgeıiniń ósýine, densaýlyq saqtaý júıesine túsetin júktemeniń kóbeıýine, kólik ınfraqurylymynyń shamadan tys júktelýine, turǵyn úı tapshylyǵyna jáne jaldaý aqysynyń qymbattaýyna alyp kelgenin alǵa tartty.
Jospar boıynsha kóshi-qon aǵynyn shekteý birneshe kezeń arqyly júzege asyrylýy tıis edi. Eger el halqynyń sany 9,5 mıllıon adamnan assa, bılik belgili bir sanattaǵy bosqyndarǵa turýǵa ruqsat berýdi toqtatyp, otbasylardy biriktirý quqyǵyn shekteýge múmkindik alar edi.
Sonymen qatar úkimet halyqaralyq kelisimder aıasynda kóshi-qondy shekteýge múmkindik beretin erekshe sharttar men qorǵanys tetikterin engizý jóninde kelissózder júrgizýge mindetteletin edi.
Eger qabyldanǵan sharalarǵa qaramastan halyq sany belgilengen mejeden asyp, eki jyl boıy joǵary deńgeıde saqtalsa jáne Bern Eýropalyq odaqpen arnaıy jeńildikter nemese qorǵanys tetikteri jóninde kelisimge kele almasa, onda Shveıtsarııa múmkin bolǵan alǵashqy sátte Eýropalyq odaqpen jasalǵan adamdardyń erkin júrip-turýy týraly kelisimnen shyǵýǵa tıis bolatyn.
Atalǵan kelisim Shveıtsarııa men Eýropalyq odaqqa múshe elderdiń azamattaryna belgilengen talaptardy saqtaı otyryp, bir-biriniń aýmaǵynda turýǵa jáne jumys isteýge ózara quqyq beredi.
Buǵan deıin shveıtsarııalyqtar halyq sanyn 10 mıllıon adammen shekteý máselesi boıynsha daýys berip jatqanyn jazdyq.
