Shveıtsarııa vıtse-prezıdentiniń sapary turaqty seriktestikti aıqyndady – sarapshy
ASTANA. KAZINFORM – Shveıtsarııa vıtse-prezıdenti Gı Parmelannyń Qazaqstanǵa sapary eki el arasyndaǵy turaqty jáne ózara tıimdi qarym-qatynastyń naqty kórinisi bolyp otyr. QR Parlamenti Senaty apparatynyń aqparattyq-taldamalyq bólimi meńgerýshisiniń orynbasary Ójet Shegirbaev osyndaı pikir bildirdi.
Sarapshynyń aıtýynsha, sapar strategııalyq dıalogti tereńdetýge, saıası seriktestikti kúsheıtýge, sondaı-aq ekonomıka, bilim, tehnologııa jáne halyqaralyq uıymdar salasyndaǵy yntymaqtastyqty keńeıtýge múmkindik beredi. 2021 jyly Prezıdent Qasym-Jomart Toqaev Gı Parmelanmen eki ret kezdesken – birinshisi vıdeokonferentsııa arqyly, ekinshisi Shveıtsarııaǵa resmı sapar kezinde. Ol kezde Gı Parmelan el prezıdenti edi. Sol kezdegi kelisimder búgingi kezdesýde pysyqtaldy.
Ójet Shegirbaev atap ótkendeı, bul sapar ınvestıtsııalardy qalpyna keltirýge serpin beredi. Bolashaqta shveıtsarııalyq tehnologııalardy tartý, óndiristi tereńdetý, jańa birlesken kásiporyndar ashý jáne kólik-logıstıka salasyn damytý – basty baǵyttar bolyp otyr. Aýyl sharýashylyǵy salasyndaǵy yntymaqtastyq ta keńeıip, eksporttyq áleýet artady.
— Shveıtsarııa naryǵyna eksporttalatyn ónimderdiń aýqymyn keńeıtý múmkindigi bar. Qazirgi tańda negizinen shıkizat eksporttalady, alaıda aýyl sharýashylyǵy, aqparattyq tehnologııalar jáne basqa da salalardaǵy áleýet tolyq paıdalanylmaǵan. Aıtalyq, buǵan deıin 90 taýar boıynsha 500 mıllıon AQSh dollarynan astam somaǵa eksportty júzege asyrý múmkindigi sóz bolǵan, — dedi Ójet Shegirbaev.
Sarapshynyń pikirinshe, sapar Qazaqstannyń Eýropada senimdi jáne jaýapty seriktes ekenin kórsetedi jáne eldiń Eýropa men Azııa arasyndaǵy transkontınenttik logıstıkalyq jáne óndiristik tizbekterdegi rólin kúsheıtedi.
— Jalpy, vıtse-prezıdenttiń sapary - tek dıplomatııalyq shara ǵana emes, eki el arasyndaǵy qatynastardy nyǵaıtýdaǵy mańyzdy kezeń. Kezdesýler men kelissózder ár sala boıynsha naqty mindetterge jol ashyp, ekonomıkalyq jáne strategııalyq yntymaqtastyqty jańa deńgeıge kóteredi. Shveıtsarııanyń 2025 jyly EQYU-daǵy tóraǵalyǵy jáne eki eldiń syrtqy saıasattaǵy ustanymdarynyń úılesimi Qazaqstannyń qaýipsizdik, dıplomatııa jáne kópjaqty ınstıtýttardaǵy rólin arttyrýǵa múmkindik beredi. Neıtraldy ári tehnologııalyq damyǵan Shveıtsarııamen yntymaqtastyq Qazaqstannyń turaqty ekonomıkasy, kópvektorly saıasaty jáne ınnovatsııalarǵa ashyq ekenin kórsetedi, — deıdi Ó. Shegirbaev.