Shveıtsarııa Tegerandaǵy elshiligin jaýyp tastady
ASTANA. KAZINFORM — Shveıtsarııa AQSh pen Izraıldiń Iranǵa jasaǵan shabýyldary aıasynda qaýipsizdik jaǵdaıynyń nasharlaýyna baılanysty Tegerandaǵy elshiligin ýaqytsha jabý týraly sheshim qabyldady, dep habarlaıdy Anadoly.
Bul týraly Shveıtsarııanyń Syrtqy ister mınıstrligi amerıkalyq X áleýmettik jelisindegi paraqshasynda habarlady.
— Qaýipsizdik jaǵdaıynyń nasharlaýyna baılanysty Shveıtsarııa Tegerandaǵy elshiligin ýaqytsha jabý týraly sheshim qabyldady, — delingen habarlamada.
Málimetke sáıkes, elshi men Shveıtsarııanyń bes qyzmetkeri búgin Irannan qurlyq arqyly shyǵyp, qazir elden tys jerde qaýipsiz jerde júr. Vedomstvo ókilderi qaýipsizdik jaǵdaıy turaqtalǵan soń qyzmetkerler Tegeranǵa qaıta oralatynyn aıtty.
Sondaı-aq, Shveıtsarııa AQSh pen Iran arasyndaǵy baılanys arnasyn deldaldyq aıasynda saqtap otyrǵany atap ótildi.
Buǵan deıin Shveıtsarııanyń qorǵanys mınıstri Martin Pfister AQSh pen Izraıldiń Iranǵa jasaǵan soqqylary halyqaralyq quqyqty buzatynyn málimdegen.
AQSh pen Izraıldiń Iranǵa shabýyly
Izraıl men AQSh Iran aýmaǵyna 28 aqpanda soqqy jasady. Bul kezde Tegeran men Vashıngton arasyndaǵy kelissózder jalǵasyp jatqan edi.
Jaýap retinde Iran tek Izraılge ǵana emes, sonymen qatar aımaqtaǵy birqatar nysanǵa — Qatar, BAÁ jáne Bahreın elderindegi amerıkalyq áskerı bazalar ornalasqan nysandarǵa soqqy jasady.
Shabýyldar saldarynan Irannyń joǵarǵy jetekshisi aıatolla Álı Hameneı jáne birneshe joǵary laýazymdy tulǵa qaza tapqany habarlandy.
Iran bıliginiń málimetinshe, AQSh pen Izraıldiń shabýyldary saldarynan 1332 adam kóz jumǵan.