Shveıtsarııa Ózbekstannyń Dúnıejúzilik saýda uıymyna qosylýyna qoldaý bildirdi
TAShKENT. KAZINFORM – Ózbekstannyń Dúnıejúzilik saýda uıymyna (DSU) qosylýy boıynsha resmı Tashkent pen Bern arasynda júrgizilgen ekijaqty kelissóz aıaqtaldy, dep habarlaıdy Kazinform agenttiginiń menshikti tilshisi.
Bul týraly DSU máseleleri jónindegi Ózbekstan prezıdentiniń arnaıy ókili Azızbek Ýrýnov málim etti.
– Kelissózderdiń nátıjeli aıaqtalýyna yqpal etken Shveıtsarııa tarapyna alǵys bildiremin. Dúnıejúzilik saýda uıymyna qosylý úshin tıisti kelisim jasalýy tıis elder qatary azaıyp keledi, - dep habarlady Azızbek Ýrýnov.
Osy kezge deıin ózbek tarapy DSU-ǵa qosylý boıynsha 30-dan asa elmen kelissóz júrgizip, sáıkesinshe 25 memleketpen tıisti kelisim jasady.
Buǵan deıin habarlaǵanymyzdaı, Ózbekstan DSU-ǵa qosylý kelissózderin bıyl aıaqtaýǵa nıetti.
DSU-ǵa qosylý boıynsha Qytaı men Ózbekstan arasyndaǵy kelissózge bıyl maýsymda elordada núkte qoıyldy.