Shveıtsarııa mýzeıinen ejelgi altyn monetalar kollektsııasy urlanǵan
ASTANA. KAZINFORM — Álemge áıgili Parıjdegi Lývr mýzeıinen keıin qaraqshylardyń nysanasyna Shveıtsarııanyń Lozanna qalasyndaǵy Rım arheologııalyq mýzeıi ilikti, dep habarlaıdy Euronews.
Shveıtsarııa bıligi mýzeıdegi kúzetshige shabýyl jasap, vıtrınany syndyryp, onda qoıylǵan ondaǵan altyn monetany urlap ketken eki qylmyskerdi izdep jatyr.
Qalalyq polıtsııanyń málimetinshe, kúdiktiler bılet satyp alyp, ózge kelýshilerdiń ketkenin kútken. Jabylýǵa az ýaqyt qalǵanda olar kúzetshige shabýyl jasap, vıtrınany talqandaǵan.
Urlanǵan monetalardyń aqshalaı quny ázirge jarııalanǵan joq, alaıda polıtsııa olardyń «arheologııalyq qundylyǵy joǵary» ekenin málimdedi.
Oqıǵa álemdik naryqta altyn baǵasy kúrt kóterilgen kezeńde bolyp otyr. Sondaı-aq Parıjdegi Lývrda bolǵan baǵaly buıymdardy urlaý oqıǵasy mýzeılerdegi qaýipsizdik júıesiniń álsiz tustaryn kórsetken edi.
Málim etilgendeı, Lozanna mýzeıiniń 64 jastaǵy shveıtsarııalyq kúzetshisi tergeýshilerge jaýap bergen, ol oqıǵadan zardap shekpegen.
Kanton prokýrorlary tergeý jumysyn bastady. Lozanna qalalyq bıligi mýzeıge keltirilgen zalal boıynsha sotqa shaǵym túsirdi, al altyn monetalardyń zańdy ıesi bolyp tabylatyn óńirlik úkimet te qylmystyq shaǵym beretinin málimdedi.
Eske sala ketsek, Lývrǵa 19 qazan kúni tańerteń urylar túsken. Qylmyskerler nebári jeti mınýt ishinde quny 88 mln eýroǵa baǵalanǵan zergerlik buıymdar men qymbat tastardy urlap ketken. Bir aptadan keıin birneshe kúdikti ustaldy. Oqıǵadan soń mýzeı zaldarynyń shamamen úshten birinde beınebaqylaý kameralary joq ekeni, al bar sıgnalızatsııanyń iske qosylmaǵany anyqtaldy. Odan bir aı ótken soń eki belgııalyq taǵy da Lývr qaýipsizdik qyzmetin aldap ótken.
Parıj prokýratýrasynyń basshysy Lor Bekkonyń aıtýynsha, Lývrǵa shabýyldy kásibı qylmyskerler emes, usaq quqyqbuzýshylyqtarmen aınalysatyn, qalanyń áleýmettik osal aýdandarynda turatyn adamdar jasaǵan.
Buǵan deıin Lývr mýzeıi 2026 jyldyń sońyna deıin 100 beınekamera ornatatyny habarlanǵan bolatyn.
Al keshe amerıkalyq rejısser Lývrda bolǵan eń tanymal urlyq oqıǵasy týraly trıllerge uqsas derekti fılm túsirýdi josparlap otyrǵanyn aıtty.