Shveıtsarııa kýrortyndaǵy órt: ótemaqy talaptary mıllıard eýroǵa jetýi múmkin
ASTANA. KAZINFORM – Shveıtsarııadaǵy Kran-Montana kýrortynda bolǵan joıqyn órtten keıin bar ıeleri men jergilikti bılikke qatysty mıllıardtaǵan eýro kóleminde talap-aryzdar túsýi múmkin, dep habarlaıdy BILD.
Qaıǵyly oqıǵa Jańa jyl qarsańynda oryn alyp, saldarynan 41 adam qaza taýyp, taǵy 115 adam túrli deńgeıde jaraqat alǵan. Qazirdiń ózinde zardap shekkenderdiń biri – bir otbasy 56 mıllıon shveıtsarııalyq frank (shamamen 61 mıllıon eýro) kóleminde ótemaqy talap etken.
Blick basylymynyń málimetinshe, 25 jastaǵy Jıl men onyń 18 jastaǵy qaryndasy Faben oqıǵa kezinde daıashylardyń ústelderge janǵan bengal otshashýlarymen birge shampan alyp kelgenin kórgen. Dál osy otshashýlar tóbege tıip, órttiń shyǵýyna sebep bolǵan.
Faben alǵashqy bolyp qaýipti baıqaǵan. Ol birneshe ret «Órt!» dep aıqaılaǵan. Alaıda sol sátte ot tez taralyp, adamdar jappaı shyǵaberis jaqqa umtylǵan. Jıl qaryndasyn jalyn astynan ıterip shyǵaryp úlgergenimen, ózi aýyr kúıik alǵan.
Faben birneshe operatsııany bastan ótkerip, oqýyn qaıta jalǵastyrýǵa májbúr bolǵan. Ol psıhologııalyq jaraqat saldarynan qalypty ómirge oralýda qıyndyq kórip otyrǵanyn aıtqan. Al Jıl denesiniń 30%-yn kúıik shalyp, komaǵa túsken. Qazir ol eńbekke jaramsyz jáne uzaq merzimdi ońaltýdy qajet etedi.
Zardap shekken baýyrlar árqaısysy 25 mıllıon frank ótemaqy talap etýde. Olardyń ata-anasy da moraldyq zııan úshin árqaısysy 2,5 mıllıon franktan, al taǵy bir týysy 1 mıllıon frank suraǵan. Talaptardyń negizi – psıhologııalyq zardap pen eńbekke qabilettiliktiń joǵalýy.
Tergeý derekterine sáıkes, jaýapty tulǵalar qatarynda bar ıeleri Jak pen Djessıka Morettı, sondaı-aq Kran-Montana qaýymdastyǵynyń basshysy Nıkolıa Fero jáne birqatar jergilikti sheneýnik bar.
Jábirlenýshilerdiń advokaty Sebasten Fantı bul isti tek ulttyq deńgeıde emes, halyqaralyq deńgeıde de qaraýǵa daıyn ekenin málimdedi. Onyń aıtýynsha, taraptar sotqa deıingi kelisimge kelýi de múmkin.
Sarapshylardyń baǵalaýynsha, basqa zardap shekkender men qaza bolǵandardyń týystary da talap-aryz berse, jalpy ótemaqy kólemi 1 mıllıard franktan asýy yqtımal. Memlekettik jáne ákimshilik quqyq professory Felıks Ýlmannyń aıtýynsha, mýnıtsıpalıtetke qarsy talap qoıýdyń zańdyq negizi bar.
– Órt qaýipsizdigi talaptaryn saqtaý – jergilikti bıliktiń negizgi mindetteriniń biri, – dedi ol SRF arnasyna bergen suhbatynda.
Aıta keteıik, buǵan deıin Vale kantony prokýratýrasy Kran-Montana ákimi men taǵy tórt sheneýnikke qatysty qylmystyq is qozǵaǵany habarlanǵan.
