Shveıtsarııa kýrortyndaǵy órt: bes sheneýnikke qylmystyq is qozǵaldy
ASTANA. KAZINFORM — Shveıtsarııanyń Vale kantony prokýratýrasy jergilikti bes sheneýnikke, sonyń ishinde Kran-Montana qalasynyń merine qatysty qylmystyq is qozǵady. Jańa jyl túninde osy taý shańǵysy kýrortyndaǵy barda órt bolyp, 41 adam qaza tapqan, dep habarlaıdy Euronews.
Shveıtsarııanyń Vale kantony prokýratýrasy Kran-Montana mýnıtsıpalıtetiniń qazirgi jáne burynǵy bes sheneýnigine qatysty qylmystyq is qozǵady. Olardyń arasynda mer Nıkolıa Fero, qaýipsizdikke jaýapty burynǵy mýnıtsıpaldyq keńes múshesi, órtke qarsy qyzmettiń burynǵy bastyǵy jáne onyń orynbasary, sondaı-aq qazirgi qoǵamdyq qaýipsizdik tobynyń bir múshesi bar.
Jańa jyl túninde Shveıtsarııadaǵy Le Constellation atty taý shańǵysy kýrortyndaǵy barda órt shyǵyp, 41 adam qaza taýyp, 115 adam jaraqat aldy. Kóbinese zardap shekkender jasóspirimder men jastar boldy.
Tergeý nusqasy boıynsha, órt bengaldyq ottardan shyqqan ushqyndar saldarynan bolǵan, olar jertóledegi tóbeniń dybys oqshaýlaǵysh jabyndysyn tutandyrǵan.
Qaıǵyly oqıǵadan eki aı ótken soń, zardap shekkenderdiń 58-i áli de Shveıtsarııadaǵy jáne sheteldegi aýrýhanalarda emdelip jatyr. Keıbiri áli de komadan shyqpaǵan.
Toǵyz adamǵa qatysty tergeý júrgizilip jatyr
Tergeý «abaısyzda órt qoıý, abaısyzda adam óltirý jáne abaısyzda aýyr dene jaraqatyn salý» baptary boıynsha toǵyz adamǵa qatysty júrgizilip jatyr, olardyń arasynda bardyń frantsýz ıeleri de bar.
Tergeýshilerge órttiń naqty qalaı shyqqanyn jáne Le Constellation baryn ıeleri qaýipsizdik standarttaryn qanshalyqty saqtaǵanyn anyqtaý qajet bolady.
Qazir belgili bolǵandaı, Kran-Montana mýnıtsıpalıteti 2019 jyldan beri qaýipsizdik tekserýlerin ótkizbegen, al olar ár jyly uıymdastyrylýy tıis bolǵan. Mundaı tekserýlerdi júrgizýge resýrstar jetkiliksiz degen eskertýler birneshe ret jasalǵanymen, jergilikti keńes músheleri eshqandaı áreket jasamaǵan. Mýnıtsıpalıtet tarapynan ketken mundaı kóptegen olqylyq keıbir advokattardy, órt qurbandarynyń otbasylarynyń múddesin qorǵaıtyndardy, saıası bılikti de tergeýge tartýdy talap etýge ıtermeledi.
6 qańtardaǵy baspasóz konferentsııasynda Nıkolıa Fero 2020–2025 jyldary kezekti tekserýler júrgizilmegenin moıyndap, «biz buǵan qatty ókinemiz» dedi. Ol otstavkaǵa ketýden bas tartyp: «men daýyl kezinde kemeni tastap ketpeımin» dep málimdedi.
Bes kúdiktini jáne bar ıesi Jak Morettıdi prokýror 7–15 sáýir aralyǵynda jaýapqa tartady dep kútiledi.
Keıin Shveıtsarııanyń Federaldyq keńesi Kran-Montana kýrortyndaǵy órtten zardap shekkender men qaza tapqandardyń otbasylaryna birjolǵy qarjylyq ótemaqy tóleý týraly sheshim qabyldady.