Shveıtsarııa kólinen 2000 jyl burynǵy kemeniń júgi tabyldy
ASTANA.KAZINFORM — Shveıtsarııadaǵy Nevshatel kóli túbinen bizdiń zamanymyzdyń 20–50 jyldaryna jatatyn myńnan astam óte jaqsy saqtalǵan keramıkalyq buıymdar men qylyshtar tabyldy, dep habarlaıdy Euronews.
Boljam boıynsha, olar rımdik lagerlerdiń birine jetkizilýi tıis bolǵan, alaıda júk tasymaldaǵan keme apatqa ushyraǵan.
Sýasty arheologtary Nevshatel kóli túbinen Rım ımperııasy kezeńine tıesili myńnan astam keramıkalyq zat pen qarý-jaraq tapqan. Bul rımdik kemelerdiń biriniń júgi bolýy múmkin.
Alǵashynda arheologtar Faben Langenegger men Jıýlen Pfıffer bul mańyzdy oljany tonalýdan qorǵaý úshin qupııa saqtaǵan.
Jıýlen Pfıfferdiń aıtýynsha, olar alǵashynda bul úıindi Ekinshi dúnıejúzilik soǵys kezinen qalǵan mınalar bolýy múmkin dep oılaǵan. Alaıda jaryq túsirgende terrakotaǵa tán tús baıqalyp, synǵan ydystardy kórgende bul erekshe jańalyq ekenin túsingen.
Ǵalymdardyń boljamynsha, júk tıegen keme b.z. 20–50 jyldary aralyǵynda sýǵa ketken. Qazir mamandar keramıkalyq ydystardan tabylǵan taǵam qaldyqtaryn zerttep jatyr.
Bul olja 2024 jyldyń qarasha aıynyń sońynda tabylǵanymen, maroderliktiń aldyn alý úshin uzaq ýaqyt qupııa saqtalǵan.
Zertteýge dron arqyly túsirilgen beıneler túrtki bolǵan: sońǵy jyldary kól túbinen qaraıǵan birdeńe kórinip, ǵalymdar onyń túbinde batyp ketken keme bolýy múmkin dep boljaǵan. Zertteý jumystary 2025 jyly eki apta, al 2026 jyly shamamen bir aıǵa sozyldy. Octopus qorynyń sýasty arheologtary 1000-nan astam zat tapty.
Zertteýshilerdiń pikirinshe, bul Shveıtsarııada jasalǵan as úı ydystaryn rımdik lagerge jetkizýge arnalǵan júk kemesi bolǵan. Tabylǵan jáshikterdiń biri b.z. 17 jylǵa tıesili.
Kemeniń qaldyqtary ázirge tabylǵan joq. Buǵan deıin rımdik kemeler Reın ózeni men Rona ózeninen tabylǵan.
Sonymen qatar legıonerlerge tıesili jabdyqtar — eki gladıator qylyshy, qanjar, beldik ilgegi men fıbýla tabylǵan. Bul kemeni legıonerler kúzetip júrgenin kórsetedi. Tabylǵan zattardyń sanyna qaraǵanda, júk shamamen 6 myń adamdyq legıonǵa arnalǵan bolýy múmkin.
Sondaı-aq kól túbinen órilgen sebet tabylǵan. Arheologtardyń aıtýynsha, ol keremet túrde saqtalyp, ishinde basqa júkten erekshelenetin alty keramıkalyq buıym bolǵan. Bul teńizshilerdiń qarapaıym ydystary men azyǵy bolýy múmkin.
Arheologtar sý astynan barlyq artefaktini, myńnan astam zatty shyǵaryp alǵan. Olar tor nemese maroderler saldarynan zaqymdaný qaýpinde bolǵan. Qazir bul zattar qurlyqta tazartylyp, qalpyna keltirilip jatyr.
Zertteý toby 2027 jyly kitap pen derekti fılm shyǵarýdy josparlap otyr. Sonymen qatar tabylǵan oljalar Laténium arheologııalyq mýzeıinda qoıylady. Kórmeniń naqty kúni ázirge belgisiz.