Shveıtsarııa Qazaqstannan zańsyz shyǵarylǵan aktıvterdi qaıtarýǵa kómektesetin boldy
ASTANA. KAZINFORM - Qazaqstan men Shveıtsarııa qylmystyq ister boıynsha ózara quqyqtyq kómek kórsetý jáne zańsyz shyǵarylǵan aktıvterdi qaıtarý týraly kelisimge qol jetkizdi, dep habarlaıdy QR Bas prokýratýrasynyń baspasóz qyzmeti.
Baspasóz qyzmetiniń málimetterine qaraǵanda, Qazaqstannyń Bas prokýrory Berik Asylovtyń 2024 jylǵy 5 qarashada Bern qalasyna (Shveıtsarııa) jasaǵan sapary barysynda Shveıtsarııanyń Bas Prokýrory Shtefan Blattlermen jáne Shveıtsarııanyń Federaldyq ádilet ofısi Dırektorynyń orynbasary Lorens Fontana ıÝngomen kelissózder júrgizdi.
Taraptar qylmystyq ister boıynsha halyqaralyq quqyqtyq yntymaqtastyqtyń jáne zańsyz aktıvterdi qaıtarýdyń tetikteriniń tıimdiligin arttyrýdyń ózekti máselelerin talqylady.
Qadaǵalaý vedomstvosynyń basshysy Qazaqstan Respýblıkasynyń Prezıdenti Q.K. Toqaev bastaǵan reformalar, 2023 jylǵy shildede qabyldanǵan zańsyz shyǵarylǵan aktıvterdi memleketke qaıtarý týraly zań, Qazaqstannyń Bas prokýratýra janynda tıisti komıtettiń, sondaı-aq qaıtarylǵan qarajatty áleýmettik-ekonomıkalyq mańyzdy jobalardy qarjylandyrý úshin bóletin arnaıy qordyń qurylýy jáne 2022 jyldan beri Qazaqstanǵa 3,5 mıllıardtan astam dollar qaıtarylǵany týraly aıtty.
Qazaqstannyń Bas Prokýrory sheteldik, sonyń ishinde shveıtsarııalyq ınvestorlardy quqyqtyq qorǵaýdyń mańyzdylyǵyn atap ótip, bul eki el arasyndaǵy ekonomıkalyq yntymaqtastyqty nyǵaıtýǵa yqpal etetinin jetkizdi.
Bas prokýror Blattler men Dırektordyń orynbasary Fontana ıÝngo Qazaqstanǵa zańsyz shyǵarylǵan aktıvterdi qaıtarý jáne halyqaralyq yntymaqtastyqty odan ári damytý máselelerinde qoldaý kórsetýge daıyn ekendikterin rastady.
Shveıtsarııa Ádilet basqarmasynyń ókilderi Qazaqstannyń qylmystyq ister boıynsha ózara quqyqtyq kómek týraly Eýropalyq konventsııaǵa qosylýǵa degen umtylysyn qoldady.
Sapardyń qorytyndysy boıynsha taraptar qylmystyq ister boıynsha ózara quqyqtyq kómek kórsetý týraly ózara túsinistik týraly úkimetaralyq Memorandýmǵa qol qoıdy. Qujatqa Qazaqstannyń Úkimeti atynan Bas prokýror, al Shveıtsarııa Úkimeti atynan Federaldyq ádilet basqarmasy Dırektorynyń orynbasary qol qoıdy.
Memorandým eki eldiń qylmystyq ister boıynsha dáleldemeler men aqparat almasý, sonyń ishinde zańsyz shyǵarylǵan aktıvterdi qaıtarý rásimderin jedeldetýge degen umtylysyn kórsetedi.
Osyǵan deıin zańsyz aktıvterdi qaıtarýúshin elde 220 trln teńgelik bank operatsııalary tekserilip jatqany týraly habarladyq.
