Shveıtsarııa Qazaqstanǵa turaqty reıster ashý múmkindigin qarastyryp jatyr
ASTANA. KAZINFORM — Qazaqstan men Shveıtsarııa aptasyna 28 jolaýshylar reısin oryndaýǵa kelisti. Astana qalasynda Qazaqstan Respýblıkasynyń jáne Shveıtsarııa Konfederatsııasynyń avıatsııalyq bılikteri arasynda kelissózder ótti. Bul týraly Kólik mınıstrligi málim etti.
Qazaqstandyq delegatsııany QR Kólik mınıstrligi Azamattyq avıatsııa komıtetiniń tóraǵasy Saltanat Tompıeva basqardy. Shveıtsarııalyq delegatsııaǵa Shveıtsarııanyń Federaldyq azamattyq avıatsııa basqarmasynyń (FOCA) kelissózder baǵytynyń basshysy Loran Noel jetekshilik etti.
Kelissózderge sondaı-aq Air Astana, SCAT, SWISS International Air Lines áýe kompanııalarynyń, Bazel qalasy áýejaıynyń basshylary, QR Syrtqy ister mınıstrliginiń jáne Shveıtsarııa Konfederatsııasynyń Qazaqstan Respýblıkasyndaǵy Elshiliginiń ókilderi qatysty.
Kezdesý barysynda taraptar tikeleı áýe qatynasyn damytý perspektıvalaryn jáne jańa baǵyttardy ashýǵa qatysty praktıkalyq máselelerdi talqylady.
— Kelissózder qorytyndysy boıynsha eki eldiń avıatsııalyq bılikteri Ózara túsinistik týraly memorandýmǵa qol qoıdy. Qujat taǵaıyndalǵan áýe kompanııalarǵa aptasyna 28 jolaýshylar reısine deıin oryndaý quqyǵyn beredi. Sonymen qatar júk tasymaldaryn reıs jıiligi men syıymdylyǵyna shekteýsiz oryndaýdyń quqyqtyq negizi qalyptastyryldy, — delingen habarlamada.
Taraptar sondaı-aq keıinnen qol qoıý maqsatynda Áýe qatynasy týraly kelisim jobasynyń mátinin kelisip, parafırledi. Atalǵan kelisim Qazaqstan men Shveıtsarııa arasyndaǵy áýe qatynasyn odan ári damytý úshin jańartylǵan quqyqtyq negiz qalyptastyrady.
Shveıtsarııa tarapy eki el arasyndaǵy tikeleı áýe qatynasyn damytýdyń perspektıvalaryn atap ótip, qazirgi ýaqytta Qazaqstanǵa turaqty reıster ashý múmkindigin qarastyryp jatqanyn habarlady.
Qazaqstan men Shveıtsarııa arasyndaǵy tikeleı áýe qatynasynyń damýy eki el arasyndaǵy týrızm, saýda-ekonomıkalyq jáne iskerlik baılanystardy nyǵaıtýǵa, sondaı-aq ózara jolaýshylar jáne iskerlik aǵyndardy arttyrýǵa qosymsha múmkindikter beredi.
Buǵan deıin Qazaqstan men AQSh arasynda tikeleı áýe qatynasyn ashýǵa daıyndyq júrip jatqanyn habarladyq.
