Shveıtsarııa Gazadan 20 balany emdeýge qabyldaıdy

ASTANA. KAZINFORM — Shveıtsarııa úkimeti Gazada zardap shekken 20 shaqty balany emdeý úshin qabyldaýdy josparlap otyrǵanyn habarlady, dep jazdy ANEZ agenttigi.

Sondaı-aq málimdemede Gaza sektoryndaǵy jaǵdaıǵa baılanysty aımaqtardan balalardy evakýatsııalaýdyń qashan júzege asyrylatyny belgisiz ekeni, alaıda qazir úılestirý jumystary júrgizilip jatqany aıtylǵan.

Patsıentterdiń tizimin júrgizetin Dúnıejúzilik densaýlyq saqtaý uıymymen irikteý jumystary tyǵyz yntymaqtastyqta júrgizilip jatyr. Úkimet tańdalǵan balalar men olardyń otbasy músheleri qaýipsizdik tekserýinen ótetinin aıtady. Kelgennen keıin olar baspana alý rásiminen ótýi tıis.

— Úkimet jumysty uıymdastyrý jáne tasymaldaý shyǵyndaryn óteıdi. Al medıtsınalyq shyǵyndardy balalardy qabyldaıtyn Shveıtsarııa kantondary nemese aýrýhanalar óz erikterimen kóteredi, — dep qosty departament.

Dúnıejúzilik densaýlyq saqtaý uıymy Gazadan evakýatsııalaý úshin shamamen 19 000 patsıentti tirkedi. Onyń 4 myńy bala. Olardyń kóbinde densaýlyǵyna qaýip tóndiretin jaraqaty bar nemese jergilikti deńgeıde emdeýge kelmeıtin aýrýlarmen aýyrady.

Tamyz aıynda Shveıtsarııa Syrtqy ister mınıstrligi Gazaǵa aýqymdy gýmanıtarlyq kómek qajet ekenin málimdedi.